Më 25 mars 1998, pak javë pas rënies së komandantit Adem Jashari dhe masakrës mbi familjen Jashari në Prekaz, 22 anëtarë të Kongresit të SHBA-së, mes tyre edhe politikani i njohur Eliot Engel, i kishin shkruar një letër presidentit Bill Clinton, duke e alarmuar për situatën në Kosovë.
Në dokumentet e deklasifikuara është publikuar edhe letra e kongresmenëve amerikanë, e cila e paralajmëronte presidentin Clinton për spastrimin etnik që mund të ndodhte në Kosovë.
Letra e kongresmenëve amerikanë drejtuar presidentit Bill Clinton:
Ne ju shkruajmë me një ndjenjë të fortë urgjence për të kërkuar një takim me ju, për të diskutuar situatën e përkeqësuar në Kosovë.
Siç e dini, për më shumë se një javë, personeli policor dhe ushtarak serb u angazhuan në një seri sulmesh brutale ndaj komuniteteve etnike shqiptare brenda Kosovës. Dhjetëra civilë të paarmatosur janë vrarë dhe dhjetëra të tjerë janë plagosur. Jemi të alarmuar se duke pasur parasysh sjelljen e tyre në të kaluarën, serbët mund të udhëtojnë edhe një herë në rrugën e shëmtuar të spastrimit etnik.
Jemi të kënaqur kur dëgjojmë deklaratat e fundit të Madeleine Albright se “ne nuk do të rrimë dhe të shikojmë autoritetet serbe të bëjnë në Kosovë atë që nuk mund ta bëjnë më në Bosnje”. Megjithatë, ne besojmë se deklarata të tilla duhet të mbështeten me veprime konkrete. Prandaj, me respekt kërkojmë që të takohemi me ju sa më shpejt të jetë e mundur. Mezi presim të dëgjojmë nga ju.
