I dërguari i posaçëm i Bashkimit Evropian për dialogun mes Kosovës dhe Serbisë, Miroslav Lajçak dhe i dërguari i posaçëm i SHBA-së për Ballkan, Gabriel Escobar, i kanë paraqitur kryeministrit Albin Kurti propozimin me tri elemente. I pari është deeskalimi i situatës në terren në tri komunat veriore, pastaj zgjedhje të shpejta në këto komuna si dhe rikthimi në dialog.
Pas takimit që patën mbrëmjen e së hënës, të dy emisarët thanë se faktori ndërkombëtar është unik në këto kërkesa dhe shpresojnë se do të dëgjojnë.
I dërguari i BE-së, Lajçak, deklaroi se ky është vetëm fillimi i misionit të tyre në Prishtinë dhe Beograd ndërsa i pyetur nëse ka pajtueshmëri për zgjedhje të reja, ai tha se nuk ka ende një marrëveshje.
Ai tha se diskutimi ishte i hapur i gjatë, i sinqertë, dhe i vështirë por që u shfrytëzua për të shkëmbyer idetë.
Lajçak: Kemi paraqitur propozimin me 3 elementë
“Fatkeqësisht jemi kthyer në Prishtinë për t'u marrë me menaxhimin e krizës, në vend të normalizimit të marrëdhënieve. Ky nuk është një lajm i mirë dhe ne jemi këtu në emër të Bashkimit Evropian dhe Shteteve të Bashkuara, së bashku me kolegun dhe mikun tim Gabriel, për të ndihmuar në gjetjen e zgjidhjes së situatës në veri dhe kemi paraqitur propozime në emër të komunitetit ndërkombëtar që përmbajnë 3 elementë. I pari është deeskalimi i situatës në terren, i dyti, zgjedhje të shpejta, të reja në veri dhe i treti kthimi në dialog në proces normalizimi. Ne patëm një diskutim të gjatë, të sinqertë, të vështirë me kryeministrin për këto pika, dhe kjo është aq sa mund të them deri tani sepse misioni ynë sapo ka nisur dhe nesër do të kemi një ditë të plotë takimesh dhe më pas do të vazhdojmë të punojmë”, deklaroi Lajçak.
Emisari amerikan, Gabriel Escobar, deklaroi se çdo vend mik i Kosovës sot ka të njëjtën kërkesë siç ia kishin parashtruar ata kryeministrit Kurti.
Escobar: Shpresoj se kërkesa jonë do të dëgjohet
“Nuk kam parë kaq shumë unitet në komunitetin transatlantik, Shtetet e Bashkuara, Bashkimi Evropian, NATO dhe pothuajse çdo mik tjetër i Kosovës ka bërë të njëjtën kërkesë identike, kështu që shpresoj se kërkesa jonë do të dëgjohet”, deklaroi Escobar.
Lajçak deklaroi se në veri duhen kryetarë të cilët kanë legjitimitet.
Lajçak: Ligjshmëria nuk do të thotë legjitimitet
“Ekziston një çështje që ligjshmëria nuk do të thotë përfaqësim dhe legjitimitet, dhe pikërisht ky është problemi që po e kemi në veri dhe prandaj është në interes të Kosovës, dhe të gjithëve, që të kemi kryetarë komunash që kanë ligjshmërinë e plotë legjitime, por gjithashtu legjitimitetin dhe përfaqësimin”, tha Lajçak.
Escobar deklaroi se Shtetet e Bashkuara janë mbështetësi më i madh për Kosovën prandaj kërkojnë nga autoritetet që të dëgjojnë kërkesat e tyre.
Escobar: Duam më të mirën për Kosovën
“E vetmja gjë që mund të them është se erdha këtu si një përkrahës i madh i Kosovës. Duam më të mirën për Kosovën. Ne dëshirojmë që Kosova të arrijë të gjitha aspiratat e saj. Ne jemi mbështetësi më i madh i sigurisë, pavarësisë, sovranitetit dhe integritetit tuaj territorial. Gjithçka që kërkoj është që të dëgjohemi, kërkesa jonë të dëgjohet”, tha Escobar.
Të dy emisarët do të qëndrojnë edhe nesër (e martë) në Kosovë, ku fillimisht në mëngjes do të takojnë presidenten Vjosa Osmani ndërsa gjatë ditës edhe përfaqësuesit e Listës Serbe.