Si e priti familja e fëmijës 13 vjeçar që u vra në luftë, dënimin e Zoran Vukotiq?

Aktuale

Si e priti familja e fëmijës 13 vjeçar që u vra në luftë, dënimin e Zoran Vukotiq?

Më: 10 qershor 2025 Në ora: 19:34
Foto ilustrim

Përpos familjarëve të të dëmtuarve, shpalljen për akuzat për krime lufte, nuk e ndoqi nga afër, vet i akuzuari, Zoran Vukotiq.

Ai u shpall fajtor për veprën penale, krim i luftës kundër popullatës civile, vrasjen e fëmijut 13 vjeçar.

Për këtë vepër, të cilën e shpjegoi shkurtimisht kryetari i trupit gjykues, Vukotiq u dënua me 15 vjet burgim.

“Pikërisht në rrugën kryesore, në drejtim të varrezave të qytetit i shohin tre policë të uniformuar dhe të armatosur. E në momentin kur dy fëmijët, fillojnë të kthehen me bicikletë për të ikur, njëri nga policët e uniformuar, tani i akuzuari Zoran Vukotiq, pa paralajmërim nga largësia përafërsisht 30-40 metra, gjuan me armë zjarri në drejtim të fëmijëve, duke qëlluar në gjoks fëmijën, Burim Muli, i cili edhe vdes menjëherë”, ka thënë Beqiri, kryetari I trupit gjykues.

Të pakënaqur me këtë dënim, u shprehën familjarët e fëmijut të vrarë, Burim Muli.

“Nuk është asgjë, le ta lirojnë krejt. 15 vjet. E di që është ligji, por ne jemi shtet, ne duhet me formu Gjykatën tonë, ligjet tona. Le të dënohet me ligjet e shtetit të Kosovës, e jo me ligje të ish Serbisë”, është shprehur Hajrullah Muli, babai i Mulit.

“Më thojke, pse nanë këta, serbët e romët po dalinnë rrugë e na s’po guxojmë. Edhe veç kur kom ni që Burimin e kanë vra”, ka thënë nëna e tij, Fatime Muli.

Përpos vrasjes së Burim Mulit, Vukotiq, u përballë me Prokurorinë Speciale në një aktakuzë voluminoze, që përfshinte dhunim seksual e maltretim të civilëve shqiptarë.

Për këto vepra penale, Gjykata tha se nuk kanë gjetur prova, me ç’rast Vukotiq u lirua nga përgjegjësia penale.

“Për rastin e dhunimit të një femre në Vushtrri, e identifikuar si dëshmitarja B1, Gjykata nga provat e administruara nuk ka arritur të vërtetojë përtej dyshimit të bazuar mirë se kryerësi i kësaj vepre penale është i akuzuari”, ka thënë tutje Beqiri.

Ky vendim i gjyqësorit, solli keqardhje në Qendrën Kosovare për rehabilitimin e të mbijetuarve të torturës.

“Ne do të ndjekim gjitha hapat ligjorë për ta apeluar rastin dhe për ta ndjekur në fund. Neve na vjen keq që ky rast përfundoi se rasti i Vasfije Krasniqit, domethënë ajo dëshmohet se ka qenë viktimë e dhunës seksuale, ndërsa për aspekte procedurale nuk është marrë për bazë”, është shprehur Feride Rushiti.

Vendimi i së martës, u bë për aktakuzën e Prokurorisë Speciale, e cila kishte bashkuar katër aktakuza të veçanta, që e ngarkonin Vukotiq me vepra penale për krime të luftës.

comment Për komente lëvizni më poshtë
Sot mund të lexoni Shfletoni kopertinat