“Protestoj”- Valon Murtezaj thotë se prezantimi i agjendës për Qeveri Uniteti nga LDK po bëhet pa asnjë konsultim

Aktuale

“Protestoj”- Valon Murtezaj thotë se prezantimi i agjendës për Qeveri Uniteti nga LDK po bëhet pa asnjë konsultim

Nga: M.L. Më: 11 qershor 2025 Në ora: 16:37
Valon Murtezaj

Anëtari i Këshillit të Përgjithshëm të LDK-së, Valon Murtezaj, ka reaguar ashpër ndaj paralajmërimit të liderit të subjektit, për prezantimin e një agjende qeverisëse për siç thotë pa konsultim me organet statutare të partisë.

Ai e ka quajtur këtë veprim “pikën më të ulët të demokracisë” në LDK dhe ka theksuar se partia politike s’është kompani ndërtimore, transmeton klankosova.tv.

”PROTESTOJ

Si një anëtar i Këshillit të Përgjithshëm të Lidhjes Demokratike të Kosovës, shpreh indinjatën time të thellë me medodat e punës të instaluara në majën e vendim-marrjes në Lidhjen Demokratike të Kosovës.

Prezantimi i paralajmëruar për nesër i një agjende lidhur me një orientim qeverisës, pa asnjë konsultim, dhe pa asnjë miratim të organeve statutare partiake shënon pikën më të ulët të demokracisë në subjektin politik të Lidhjes Demokratike të Kosovës.

Një orientim i tillë politik për Republikën e Kosovës duhet të ndërtohet përmes konsultimeve të gjëra.

Në aspektin statutar, kjo është përgjegjësi dhe kompetencë vetëm e Këshillit të Përgjithshëm të Lidhjes Demokratike të Kosovës.

Sa është serioze kjo performancë tregojnë emërtimet ad-hoc të përdorura brenda një periudhe të shkurtër:

Qeveri Nacionale e Tranzicionit

Qeveria Nacionale Kalimtare

Qeveri Gjithpërfshirëse Kalimtare

Qeveri Gjithpërfshirëse e Unitetit

Qeveri e Unitetit

Qeveri e Unitetit Kombëtar

LDK-ja e Ibrahim Rugovës, e demokracisë së parë në këtë rajon, e heronjve të lirisë, e heronjve të demokracisë, e patriotëve për Kosovën, nuk duhet ta braktisë demokracinë.
Është e pafalshme, është e dëmshme, për LDK-në, dhe për Kosovën.

Partia politike nuk është kompani ndërtimore.

Partia politike është organizatë shtet-ndërtimore.

Autokracia dhe oligarkia në LDK nuk ka vend dhe nuk do të këtë.

Për demokraci gjithmonë”.

comment Për komente lëvizni më poshtë
Sot mund të lexoni Shfletoni kopertinat