Analisti politik Xhavit Drenori ka reaguar ndaj deklaratës së deputetit opozitar Bekë Berisha, i cili pranoi se ka qenë gabim bllokimi i procesit të konstituimit të Kuvendit në këtë fazë.
Në një postim në rrjetet sociale, Drenori e cilëson këtë deklaratë si më shumë se një vetëreflektim, duke e përshkruar atë si dëshmi për mungesën e pragmatizmit politik brenda opozitës.
“Kur një deputet opozitar pranon publikisht se është dashur të votohet kandidati i fituesit të zgjedhjeve, kjo nuk është vetëm vetëreflektim, por edhe dëshmi për një pragmatizëm politik që i ka ikur nga dora shumicës së opozitës,” shkruan ai.
Sipas Drenorit, vendimi për të bllokuar konstituimin ka ardhur si rezultat i emocioneve politike dhe kalkulimeve afatshkurtra, dhe jo për stabilitet institucional apo vullnet qytetar.
Postimi i plotë:
“Kemi gabuar që jemi blloku në këtë fazë…” – Deputeti Bekë Berisha
Kur një deputet opozitar pranon publikisht se është dashur të votohet kandidati i fituesit të zgjedhjeve, kjo nuk është vetëm #vetëreflektim, por edhe dëshmi për një #pragmatizëm politik që i ka ikur nga dora shumicës së opozitës.
Në vend se të lexonin drejt vullnetin qytetar dhe të angazhoheshin për stabilitet institucional, shumë opozitarë u mbërthyen nga emocionet dhe kalkulimet afatshkurtra.
Fjalët e Berishës janë një kujtesë e fortë: kur mungon pragmatizmi demokratik, mbizotëron bllokada dhe dëmtohet vendi.