Dorëheqja e Krasniqit, reagon Lladrovci: Ky do të jetë kryetar i ri i PDK-së

Aktuale

Dorëheqja e Krasniqit, reagon Lladrovci: Ky do të jetë kryetar i ri i PDK-së

Nga: A.SH Më: 12 nëntor 2025 Në ora: 16:00
Ramiz Lladrovci

Kryetari i Drenasit, Ramiz Lladrovci, ka reaguar pas dorëheqjes së Memli Krasniqit.

Ai ka përgëzuar strukturat e PDK-së dhe qytetarët e Drenasit për mbështetjen e dhënë, duke riafirmuar besnikërinë e tij ndaj partisë.

Ai përshëndeti largimin e kryetarit të deritashëm, Memli Krasniqi, dhe u shpreh mbështetje për kryetarin në ardhje, Bedri Hamza, duke e cilësuar PDK-në si themeluesen e lirisë dhe shtetit të Kosovës.

Postimi i plotë:

Partia Demokratike është vet liria dhe shteti i Kosovës!

Përgëzoj strukturat e PDK-së për mbështetjen që ma kanë dhënë në çdo situatë, me besimin e plotë se do të bëhet mirë. Falënderim i veçantë shkon për qytetarët e komunës së Drenasit, të cilët besuan në zotimin tim se s’ka bir nane që më largon nga PDK-ja.

Besimi im në sinqeritetin e anëtarësisë, ashtu dhe udhëheqësve të PDK-së, ka qenë i madh. Ky hap i pritshëm i kryetarit të deritashëm, Memli Krasniqi do përshëndetur, njëherësh, duke i ofruar fuqishëm përkrahje kryetarit në ardhje, Bedri Hamza.

Të jesh lider i partisë që buroi nga Drejtoria Politike e UÇK-së, është përgjegjësi e madhe, përgjegjësi për ta dërguar shtetin në nivel më të lartë, sinqerisht, me tërë forcat përparimtare të vendit. Partia Demokratike është vet liria dhe shteti i Kosovës!

Të jesh lider i Partisë Demokratike të Kosovës, do të thotë të jesh shtetformues e shtetndërtues, gjithëpërfshirës e përbashkues, trim dhe i drejtë, largpamës e vizionar, burrështetas dhe lider në fjalë e vepra. Suksese të mëtejme parti e liderëve tanë të luftës dhe paqes, suksese PDK!

comment Për komente lëvizni më poshtë
Sot mund të lexoni Shfletoni kopertinat