“U hoq Komandant Drini..”, “U mashtruan ndërkombëtarët..”, Prokuroria me deklarata tronditëse për katërshen e akuzuar

Aktuale

“U hoq Komandant Drini..”, “U mashtruan ndërkombëtarët..”, Prokuroria me deklarata tronditëse për katërshen e akuzuar

Më: 10 shkurt 2026 Në ora: 07:22 Përditësuar në ora: 10:39 më 10.02.2026
Hashim Thaçi e Rexhep Selimi

Prokuroria: Thaçi dhe Veseli ishin të përfshirë në emërimin e komandantëve të UÇK-së

Prokurori i Hagës, Matthew Howling ka vazhduar me fjalët përmbyllëse në gjyqin ndaj ish-krerëve të Ushtrisë Çlirimtare të Kosovës.

Ai ka theksuar se Kadri Veseli ka pasur rol në emërimet në UÇK.

“Kadri Veseli dhe Hashim Thaçi ishin të përfshirë në emërimet e komandantëve”, tha prokurori.

Siç tha ai, Veseli ishte pjesë e vendimit për emërimin e personave, që sipas Howling, mbikëqyrën operacionet e torturës.

Prokurori: Duhet parë me kujdes besueshmëria e Sokol Bashotës, duket që ka qenë...

Prokurori Matt Halling ka hedhur dyshime mbi besueshmërinë e dëshmitarit të tyre, Sokol Bashota, lidhur me kyçjen e Hashim Thaçit në Shtabin e Përgjithshëm të UÇK-së.

Prokurori tha se provat të cilat i përdorë mbrojtja në përpjekje për të dëshmuar se Thaçi u kyç në Shtabin e Përgjithshëm në nëntor të 1998-ës burojnë vetëm nga Sokol Bashota.

Halling tha se dëshmia e Bashotës është kontradikte, e kjo tregohet nga një mal me prova.

“Dëshmia e tij kontradiktohet nga një mal me prova përfshirë edhe vetë përshkrimin e Hashim Thaçit në lidhje me punimet e brendshme të Shtabit të Përgjithshëm të UÇK-së përpara dhe provat shtesë”, tha ai.

Prokurori shtoi se nuk është e qartë nëse edhe vetë mbrojtja e Thaçit e beson Bashotën në lidhje me këtë.

“Provat që ka dhënë Sokol Bashota nuk mund të jenë të besueshme në lidhje me këtë pikë. Kjo tregon se duhet parë me kujdes besueshmëria e tij në lidhje me aspektet që ka diskutuar sepse ai në fakt duket që ka qenë në favor të të akuzuarve”, u shpreh ai.

Prokurori tha se ka prova që Hashim Thaçi ishte një prej themeluesve të UÇK-së e që këtë e kishte thënë edhe Azem Syla në një deklaratë publike.

Përveç kësaj, prokurori tha se përveç Thaçit, themelues të UÇK-së ishin edhe tre të akuzuarit e tjerë.

Prokuroria: Thaçi ishte përkrahës i drejtpërdrejtë i qëllimit të përbashkët kriminal

Në fjalën e vet, Prokuroria pretendon se Hashim Thaçi ka qenë përkrahës i drejtpërdrejtë i qëllimit të përbashkët kriminal, dhe që kjo gjë mund të vërtetohet bazuar në mënyrën se si ai ka folur për Lidhjen Demokratike të Kosovës (LDK).

Lidhja Demokratike e Kosovës është një nga partitë më të vjetra në Kosovë, e themeluar në vitin 1989 nga Ibrahim Rugova. Ajo ka luajtur rol kyç në periudhën e rezistencës paqësore dhe në ndërtimin e institucioneve demokratike të vendit.

Prokurorët, më pas, u janë referuar disa deklaratave në Komunikatën 53 të UÇK-së, të 18 shtatorit 1998, në të cilën Shtabi i Përgjithshëm ka deklaruar se “vetëm në Sferkë, Prapaqan dhe Baran, ku dezertorët, ish-anëtarë të UDB-së, aktualisht institucionalistët sikurse Tahir Zemaj kanë influencë, armiku nuk gjeti rezistencë, pavarësisht se këto fshatra u dogjën, u përvëluan dhe u shkatërruan. Një ditë këta persona do të mbajnë përgjegjësi për dëmet që po u shkaktojnë popullit dhe mëmëdheut”.

Sipas Prokurorisë, ky ishte mesazh i qartë për ata që pengonin kontrollin e UÇK-së.

“Të përshkruhen kontributet e Thaçit si neutrale, është absurde, sepse ka prova për të vërtetuar të kundërtën. Nuk është kontribut neutral të thuash këto fjalë nga një pozicion siç kishte Thaçi dhe nuk është kontribut neutral të marrësh në pyetje, të kërcënosh, të rrahësh persona në Qirez”.

Prokuroria: Të akuzuarit patën rol të fortë kolektiv në Shtabin e UÇK-së

Prokuroria e ka nisur fjalën e vet duke thënë se të akuzuarit kanë pasur rol të fortë kolektiv si anëtarë kryesorë të Shtabit të Përgjithshëm të Ushtrisë Çlirimtare të Kosovës (UÇK).

“Në rolet që kishin, ishin në gjendje të shpërndanin qëllimin e përbashkët kriminal, të koordinonin veprimet e tyre dhe mohuan veprat penale në mënyrë që t'i gënjenin ndërkombëtarët”.

Hashim Thaçi përshkruhet si njëri prej themeluesve të UÇK-së, duke cituar disa deklarata të Azem Sylës.

---------

Në Dhomat e Specializuara të Kosovës, me seli në Hagë, sot vazhdon dita e dytë e deklaratave përmbyllëse në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Zyra e Prokurorit të Specializuar në Hagë ka njoftuar se ditën e martë prokurorëve do t’u nevojiten më pak se dy orë për të shpalosur përgjegjësitë penale të të akuzuarve, ndërsa në fund prokurorja e specializuar, Kimberly West, do të mbajë fjalën përmbledhëse.

Dje, West bëri të ditur se Zyra e Prokurorit të Specializuar kërkon që Hashim Thaçi, Kadri Veseli, Jakup Krasniqi dhe Rexhep Selimi të dënohen me nga 45 vjet burgim secili, apo gjithsej 180 vjet burgim.

Gjatë deklaratës përfundimtare të Prokurorisë, prokurori Nathan Quick tha se Adem Demaçi kishte një rol të kufizuar në krijimin e institucioneve, por, sipas tij, ai ishte vartës i Hashim Thaçit.

 Dhimbje qafe çdo mëngjes? Zbulo shkakun real

Mjekët paralajmërojnë: jastëku i gabuar po shkakton dhimbje ...

Mëso më shumë

Quick shtoi se, krahas rolit politik, Kadri Veseli kishte edhe funksionin e shefit të shërbimit informativ.

Në ditën e parë, prokurorët e specializuar folën për rolin që kishin të katër të akuzuarit në Ushtrinë Çlirimtare të Kosovës, duke e paraqitur këtë organizatë si një strukturë me hierarki të qartë.

Ndryshe çështja përfshin katër ish-zyrtarë të lartë të Ushtrisë Çlirimtare të Kosovës: Hashim Thaçi, Kadri Veseli, Rexhep Selimi dhe Jakup Krasniqi. 

Sipas aktakuzës, pretendohet se krimet e paraqitura në të u kryen më së paku prej marsit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore. 

Më 15 dhjetor 2022, Gjykatësi i Procedurës Paraprake ia kaloi dosjen e çështjes Trupit Gjykues II. 

Gjykimi filloi më 3 prill 2023 me deklaratat hyrëse të Prokurorit të Specializuar dhe të përfaqësuesit të viktimave, ndjekur nga ekipet e mbrojtjes më 4 dhe 5 prill 2023. 

Më 15 prill 2025, ZPS-ja e mbylli çështjen e vet. Në vendimin e tij gojor më 16 korrik 2025, Trupi Gjykues hodhi poshtë mocionin e përbashkët të Mbrojtjes për rrëzimin e akuzave në bazë të rregullës 130 të Rregullores. Më 16 dhe 17 korrik 2025, Mbrojtësi i Viktimave paraqiti provat në gjykatë. 

Konferenca Përgatitore e Mbrojtjes u mbajt më 19 gusht 2025, dhe paraqitja e provave dhe argumenteve nga Mbrojtja filloi më 15 shtator 2025, ku vetëm ekipet e Mbrojtjes së Hashim Thaçit dhe Jakup Krasniqit paraqitën prova. 

Më 2 dhjetor 2025, të dy ekipet e Mbrojtjes përfunduan paraqitjen e provave të tyre, ndërsa më 18 dhjetor 2025 u mbyll procedura e paraqitjes së provave. 

comment Për komente lëvizni më poshtë
Sot mund të lexoni Shfletoni kopertinat