PDK: Kërkojmë pako emergjente për përballimin e rritjes së çmimeve

Aktuale

PDK: Kërkojmë pako emergjente për përballimin e rritjes së çmimeve

Më: 3 prill 2026 Në ora: 19:50
Partia Demokratike e Kosoves

Partia Demokratike e Kosovës (PDK) bën thirrje urgjente që Qeveria të hartojë dhe zbatojë një pako emergjente për përballimin e krizës ekonomike, duke përfshirë masa për uljen e barrës financiare ndaj qytetarëve, mbështetje për familjet dhe bizneset.

“Qytetarët e Kosovës kanë nevojë për veprime të menjëhershme,” thekson PDK në komunikatën e saj.

Sipas PDK-së, gjatë seancës së jashtëzakonshme të Kuvendit për rritjen e çmimeve të naftës, shërbimeve dhe inflacionit, “kryeministri, ministrat dhe deputetët e shumicës parlamentare bojkotuan pjesë të konsiderueshme të seancës,” duke krijuar, sipas partisë, “një shpërfillje të hapur ndaj qytetarëve që përballen me rritjen e kostos së jetesës.”

PDK potencon gjithashtu se çmimi i naftës ka arritur sot 2 euro e 3 cent, duke reflektuar drejtpërdrejt në rritjen e çmimeve të produkteve dhe shërbimeve bazë. Sipas partisë, “në vend të veprimeve konkrete për lehtësimin e barrës financiare për qytetarët, po shohim heshtje dhe mungesë reagimi institucional.”

Partia Demokratike thekson se edhe kur kryeministri u rikthye në seancë, “zgjodhi të shfrytëzojë kohën për lojëra fjalësh dhe interesa partiake, në vend që të ofrojë zgjidhje konkrete për qytetarët.”

PDK konsideron se kjo qasje e Qeverisë është jo vetëm e papranueshme, por edhe e dëmshme për stabilitetin ekonomik dhe social të vendit dhe përsërit thirrjen për veprime të menjëhershme për të mbrojtur qytetarët.

comment Për komente lëvizni më poshtë
Sot mund të lexoni Shfletoni kopertinat