Urdhër mbrojtjeje, denoncime, letër prokurores dhe aktakuzë, e megjithatë u vra: Gjashtë pyetjet për rastin Arlinda Zekaj

Aktuale

Urdhër mbrojtjeje, denoncime, letër prokurores dhe aktakuzë, e megjithatë u vra: Gjashtë pyetjet për rastin Arlinda Zekaj

Nga: bota sot Më: 27 tetor 2026 Në ora: 16:03
Arlinda Zekaj – Fotoilustrim: “Bota Sot”

Arlinda Zekaj, 49-vjeçare nga Vitomirica e Pejës, nuk ishte një viktimë e panjohur për institucionet. Përkundrazi, rasti i saj kishte kaluar nëpër gjykatë, polici dhe prokurori. Kishte urdhër mbrojtjeje, kishte denoncime të përsëritura, i kishte shkruar edhe kryeprokurores. Megjithatë, mbrëmjen e 25 tetorit ajo u vra me sëpatë pak minuta pasi ishte kthyer nga stacioni policor.

I dyshuari për vrasjen, kunati i saj Albert Sylaj, sipas raportimeve të fundit vazhdon të jetë në arrati, ndonëse Policia e Kosovës e ka shpallur në kërkim me autorizim të Prokurorisë Themelore në Pejë. Ndërkohë, Prokuroria ka kërkuar paraburgim për ish-bashkëshortin e saj, Jeton Sylaj, nën dyshimin për veprën penale "mospërfillja e gjykatës".

Kryeministri Albin Kurti u ka dhënë Ministrisë së Punëve të Brendshme dhe Ministrisë së Drejtësisë një afat të shkurtër për të përfunduar raportin mbi trajtimin institucional të rastit. Por pyetjet të cilave ky raport duhet t'u përgjigjet janë të qarta që tani.

1. Si u zbatua urdhri i mbrojtjes?
Më 16 tetor, gjykata kishte lëshuar urdhër mbrojtjeje që i ndalonte ish-bashkëshortit t'i afrohej Arlindës brenda shtëpisë ku jetonin. Sipas deklaratës së saj në polici, menjëherë pas këtij vendimi, në shtëpi ishte vendosur kunati me familjen e tij, pa pëlqimin e saj. Kush e monitoroi zbatimin e urdhrit dhe a u vlerësua se rreziku thjesht kishte ndërruar fytyrë?

2. Pse denoncimi i 22 tetorit nuk pati pasoja?
Tri ditë para vrasjes, Arlinda e kishte denoncuar në polici Albert Sylajn për kanosje dhe uzurpim të shtëpisë. Sipas raportimeve, ai u intervistua vetëm në cilësinë e dëshmitarit dhe i mohoi akuzat. A u ndërmor ndonjë masë ndaj tij pas këtij denoncimi?

3. Çfarë u bë me letrën drejtuar kryeprokurores?
Arlinda i ishte drejtuar me letër edhe Kryeprokurores së Prokurorisë Themelore në Pejë. Mediat kanë publikuar një fjali nga ajo letër që sot tingëllon si paralajmërim: "Mos jepni llogari pasi të jetë marrë jeta ime". Kush e lexoi këtë letër dhe çfarë veprimi pasoi?

4. Pse aktakuza nuk u shoqërua me masë sigurie?
Prokuroria kishte ngritur aktakuzë për kanosje vetëm tri ditë para vrasjes. Aktakuza vërteton se institucionet e konsideronin kërcënimin real. Mbetet e paqartë pse kjo nuk u përkthye në masë konkrete mbrojtëse për viktimën.

5. Çfarë ndodhi natën e 25 tetorit?
Sipas raportimeve, po atë ditë ish-bashkëshorti ishte ndaluar për 48 orë pas një rasti tjetër të raportuar dhune. Rreth orës 21:00, Arlinda u shoqërua nga policia për në shtëpi, në të njëjtën shtëpi ku, sipas denoncimit të saj, ishte vendosur kunati. Pak minuta më vonë, policia u njoftua se ajo ishte sulmuar për vdekje. A u bë vlerësim rreziku para se ajo të kthehej aty? Në kontrollin e mëvonshëm të shtëpisë së të dyshuarit, policia sekuestroi një pushkë gjahu, mbi 150 fishekë, thika, një bajonetë dhe një sëpatë.

6. Si iku i dyshuari dhe pse ende nuk është kapur?
Vrasja ndodhi vetëm pak minuta pasi policia e kishte lënë viktimën. Megjithatë, i dyshuari ka arritur të largohet dhe ende kërkohet.

Rasti ka shkaktuar reagim të gjerë. Kuvendi i Kosovës mbajti seancë të jashtëzakonshme për vrasjen, organizatat e shoqërisë civile kërkojnë përgjegjësi për dështimin e institucioneve, ndërsa në qendër të Pejës është vendosur letra e Arlindës me pyetjen "Deri kur?". Për të mërkurën është thirrur protestë kombëtare.

Arlinda Zekaj bëri gjithçka që i kërkohet një viktime të dhunës: raportoi, kërkoi urdhër mbrojtjeje, shkroi, insistoi. Raporti i qeverisë do të jetë i besueshëm vetëm nëse emërton qartë se ku u këput zinxhiri dhe kush mban përgjegjësi për secilën hallkë.

Sot mund të lexoni Shfletoni kopertinat