Çfarë (çka) po ndodh në Gjirin (Golfin) e njohur Persiko-Arabik…?!

Analizë

Çfarë (çka) po ndodh në Gjirin (Golfin) e njohur Persiko-Arabik…?!

Nga: Agron Shabani Më: 1 mars 2026 Në ora: 16:45
Autori Agron Shabani

Kanalet më të fuqishme televizive të globit, së bashku me agjencitë e shumta të lajmeve nga e gjithë bota, vazhdojnë të transmetojnë pamje tronditëse ose shokuese nga Lindja e Mesme, ku gjuajtësit ose bombarduesit amerikanë dhe izraelitë kanë filluar sulme dhe bombardime masive mbi, siç thuhet, infrastrukturën e përgjithshme (nukleare–atomike) të Iranit.

Ndërkohë, iranianët, në shenjë revolte dhe hakmarrjeje ndaj amerikanëve dhe izraelitëve, kanë hedhur dronë dhe mortaja ose raketa të ndryshme në Emiratet e Bashkuara Arabe, Katar, Bahrein, Arabinë Saudite, Jordani, Izrael dhe vende të tjera, ku supozohet se ndodhen të dislokuara ose të stacionuara bazat amerikane.

Gjithashtu bëhet e ditur se edhe luftanije ruse, të ngarkuara me projekte, raketa ose armë bërthamore, sot herët në mëngjes, kanë marshuar ose lundruar në drejtim të Gjirit (Golfit) Persiko-Arabik.

Bota po mban frymën nga lufta dhe përshkallëzimet e rrezikshme, dramatike dhe tektonike në rajon.

Kontinenti i vjetër evropian, ndërkaq, sikur është gjendur para një “sanduiçi”, ose zjarri të dyfishtë të luftës së përgjakshme, shkatërrimtare dhe apokaliptike në Ukrainë, si dhe të luftës dhe përshkallëzimeve të përgjithshme në rajonin e nxehtë (shpërthyes) të Lindjes së Mesme.

Bëhet fjalë për një formulë, doktrinë ose ekuacion të rrezikshëm dhe tepër të komplikuar ushtarak, politik, strategjik ose gjeopolitik me shumë të panjohura dhe të papritura në sfond, i cili patjetër të sjell ndërmend “letrën famoze” të kryemasonit botëror, Albert Pike (Albert Pajk), dërguar liderit të njohur italian, Giuseppe Mazzini (Xhuzepe Mazini), në vitin 1871 (…) në kuptimin e luftës së të gjithëve kundër të gjithëve (bellum omnium contra omnes) – sipas projekteve dhe planimetrive djallëzore, diabolike, makabre dhe tepër funebre të shtetit të thellë ose dubioz, të quajtur shpesh si “shtet mbi shtetin” e kështu me radhë, sipas asaj: “prishni dhe shkatërroni gjithçka, për të fituar çdo gjë”!!!

Së këndejmi, është i njohur fakti se në Lindjen e Mesme, apo në rajonet e ndryshme të Gjirit (Golfit) të njohur Persiko-Arabik, përveç rezervave më të mëdha të arit, argjendit, platinës, diamantit, safirit, rubinit dhe derivateve të njohura të naftës dhe benzinës në nivel botëror ose planetar, gjithashtu kanë lindur ose janë zbuluar shkrimi ose alfabeti i parë, së bashku me ligjet e para njerëzore (qytetare), politike ose administrativo-juridike në Antikë – në Babiloni, Mesopotami, Medi (Persi), Asiri e kështu me radhë. Aty ku Hamurabi, Sargoni, Nabukadonozori, Akadi (Akadiani), Baltazari dhe mbretër ose perandorë të tjerë shkruan, hartuan ose formuluan ligje ose kodekse të ndryshme ligjore, administrative ose juridike për t’i bindur, afruar ose bërë bashkë grupet ose komunitetet e ndryshme etnike, fetare dhe kulturore të sumerëve, semitëve, urukëve, ugaritëve, akadëve etj.

Aty pra ku njerëzit, popujt, etnitetet ose komunitetet e ndryshme flisnin ose komunikonin dikur me njëri-tjetrin me gjuhë dhe dialekte të ndryshme, të pakuptimta, të përziera ose aglutinative me njëra-tjetrën, para mëse 6000 vjetësh.

Aty ku bota arabe ose myslimane nuk mund të gjejë dot paqen dhe qetësinë mes veti dhe me të tjerët. E sidomos me Izraelin, SHBA-në apo botën e zhvilluar të krishterë ose perëndimore.

Revoltën dhe reagimin e rreptë të Presidentit Trump dhe administratës së tij në Washington DC, pos tjerash, sikur e nxitën ose e shkaktuan paralajmërimet e regjimit autokrat, teokratik dhe despotik të mullah-ajatollahëve të Iranit për nacionalizimin dhe mbylljen e përgjithshme të Ngushticës së Hormuzit për Perëndimin dhe aleatët e tyre, ku thuhet se kalojnë ose qarkullojnë diku rreth 35 ose 40% të rezervave të përgjithshme të derivateve të naftës ose benzinës në nivel global ose planetar.

Shtoja këtu edhe vrasjet masive, gjegjësisht brutalitetin e egër ushtarako-policor të regjimit të mullah-ajatollahëve të Iranit kundër demonstruesve ose protestuesve të shumtë në Teheran, Isfahan, Abadan, Kom e qytete të tjera gjithandej Iranit, ku thuhet se e kanë gjetur vdekjen afro 32.000 demonstrues nga ushtria dhe policia e mullah-ajatollahëve të atjeshëm sadistë dhe tepër konservatorë.

Amerikanët, së këndejmi, dikur më herët e vranë në Irak edhe gjeneralin e njohur iranian, Kasem Sulejmani, i specializuar në akademitë elitare ushtarake të Rusisë etj., i cili njihej si “hero” ose “ikonë ushtarake” e Iranit dhe bllokut shiit (shiia) në rajon, gjegjësisht si “terrorist” ose armiku kryesor i SHBA-së dhe Izraelit atje.

Pas tij, nga ushtria izraelite dhe amerikane u vranë edhe Rania, Nasrallah dhe liderë të tjerë të Hizbollahut proiranian në Liban.

Së këndejmi, averzionet, antagonizmat, hasmëritë dhe rivalitetet e përgjithshme mes bllokut (kampit) të sunnitëve (sunni) dhe shiitëve (shiia) në rajon, sikur u rritën akoma më shumë pas fiaskos ose disfatës totale të bllokut (kampit) sunnit në fillimet e luftës qytetare në Siri, kur trupat e atëhershme qeveritare të Bashar el-Assadit dhe kampit shiit asokohe i mposhtën, shkërmoqën dhe deklasuan tërësisht grupet e ndryshme militare dhe paramilitare në Siri, të ushtruara, financuara dhe armatosura kryesisht nga Arabia Saudite, Turqia, Emiratet e Bashkuara Arabe ose blloku i madh sunnit.

Atë disfatë të rëndë, blloku i madh ushtarak, politik dhe ideologjik i sunnitëve nuk e fali dhe s’e harroi kurrë.

(…)

Në të kundërtën, duke i parafrazuar Max Weberin (Maks Veber) dhe Arthur Schopenhauerin (Artur Shopenhauer), botën e sundojnë demonët ose “dishepujt” e ndryshëm të “mbretërisë së së keqes”.

Ndaj, të gjithë ata që futen në lojërat ose ujërat e turbullta të sundimit, pushtimit, karrierës, pasurisë së pandershme ose dominimit, bëjnë pakte ose traktate të ndryshme me demonët, blasfemistët ose forcat e ndryshme diabolike.

Është e kuptueshme se roli dhe ndikimi determinant i shkencës dhe teknikës kanë luajtur një rol të rëndësishëm në historinë amerikane, sidomos nëpër fazat ose etapat e ndryshme bihevioriste ose postbihevioriste në SHBA.

Fuqia e madhe ushtarake, politike dhe ekonomike e SHBA-së, së bashku me arritjet dhe përparimet e fuqishme industriale dhe teknologjike, pos tjerash sollën edhe ngritjen ose formimin e lëvizjeve, qarqeve ose organizatave elitare të fabrikantëve, fermerëve ose sipërmarrësve të fuqishëm amerikanë, së bashku me qarqet ose elitat e njohura shkencore, intelektuale, kulturore, akademike ose gazetareske në SHBA, mbi bazën ose ideologjinë e njohur të suksesit, efikasitetit, ndershmërisë, kooperimit, ligjeve, rregullave dhe kontrollit.

SHBA-ja më tepër e ruan dhe e siguron respektin dhe autoritetin e saj global ose universal duke i mbrojtur dhe siguruar të tjerët që janë më të vegjël dhe më të dobët.

Në instancë të fundit, politika dhe diplomacia janë vazhdim i luftës me mjete ose metoda të tjera, në kuptimin se në frontin e luftës ju i shihni vetëm ushtarët ose luftëtarët e armatës kundërshtare dhe jo eprorët, komandantët ose strategët kryesorë në prapavijë ose intendancë.

ASH

comment Për komente lëvizni më poshtë
Sot mund të lexoni Shfletoni kopertinat