Tash e disa ditë po zhvillohet Kampionati Botëror në atletikë, në Oregon të Shteteve të Bashkuara të Amerikës.
Kosova përfaqësohet me atleten Gresa Bakraçi, ndërsa në ngjarjen më të madhe botërore është i pranishëm presidenti i Federatës së Atletikës së Kosovës, Halil Sylejmani.
I pari i atletikës së Kosovës, ka pasur disa takime të frytshme, si me Thomas Bach, president i Komitetit Olimpik Ndërkombëtar dhe Dobromir Karamarinov, president i Federatës Evropiane të Atletikës.
Dobromir Karamarinov dhe Halil Sylejmani
Sylejmani bisedoi për shumë gjëra, me theks të veçantë për atletikën e Kosovës.
Ai mori përkrahje të fuqishme nga i pari i Komitetit Olimpik Ndërkombëtar dhe ai i EAF-së.
“Mu dha rasti mu taku me presidentin e Komitetit Olimpik Ndërkombëtar, z. Thomas Bach, i cili përkrah jashtëzakonisht atletikën e Kosovës. Bach me tha se është se është i kënaqur që jemi pjesë e Federatave Botërore”, nënvizon Sylejmani.
“Jam i kënaqur që Federata e Atletikës së Kosovës, është këtu së bashke me Federatën Botërore të Atletikës”, ka thënë Bach.
Sylejmani ka diskutuar me Dobromir Karamarinov, president i Federatës Evropiane të Atletikës, duke kërkuar edhe përkrahje në çdo aspekt.
“Dobromiri, me siguri do të na ndihmojë mirë në punimet e Kongresit Evropian, ku kemi nevojë në ndihmë profesionale, trajner apo zyrtar. Ai tha se sa i përket ndihmës materiale është puna e ngushtuar, por sipas tij, janë në përkrahje dhe rezultatet do të vijnë.
Ai është i brengosur, se jo vetëm Federata Evropiane por edhe shumë shtete tjera janë të cunguar me rezultate”, thotë Sylejmani për gazetën kombëtare “Bota sot”.
