Gjithçka gati për Maratonën ndërkombëtare! Sylejmani: Është ngjarja më e madhe në Kosovë

Atletika

Gjithçka gati për Maratonën ndërkombëtare! Sylejmani: Është ngjarja më e madhe në Kosovë

Nga: K. Goca Më: 23 shtator 2022 Në ora: 17:47
Pamje nga konferenca

Të dielën (pasnesër) do të mbahet ngjarja më e madhe në Kosovë, Gjysmë Maratona dhe Maratona ndërkombëtare. 

Është hera e parë në vitet e pasluftës që organizohet gara e dyfishtë, Gjysmë Maratona (21.0975 km) dhe Maratona (42.195 km), e cila pritet me kureshtje të madhe nga dashamirët e mbretëreshës së sporteve. 

Deri me tash janë paraqitur 524 garues nga shtetet e ndryshme. 

Sipas Fatlum Grajçevcit, gjithçka po shkon sipas planit sa i përket kësaj gare.      

Starti dhe caku për të gjitha vrapimet do të jetë para “Teatrit Kombëtar” të Prishtinës.

Vrapimi maratonë, Gjysmë Maratonë, 10 km dhe 5 km do të startojnë në ora 9:00.

Vrapimi Gjysmë Maratonë vazhdon Fushë Kosovë - Miradi e Poshtme -  në fshatin Lepi, në drejtim te Marigona Rezidencë dhe caku para Teatrit Kombëtar në Prishtinë.

Këshilli Organizues i Maratonës “Prishtina 2022”,  presidenti i Federatës së Atletikës së Kosovës, Halil Sylejmani, tha se është ngjarje e madhe dhe është me e veçantë se të tjerat për faktin se mbahet edhe Maratona edhe Gjysmë Maratona.

“Kemi filluar që nga viti 2001 maratona e parë ndërkombëtare, e cila ka qenë gjysmë maratonë, viti 2020 ka dështuar për shkak të pandemisë. Maratona në Prishtinë organizohet nga Federata Atletikës e Kosovës dhe Departamenti i Sporteve, përkatësisht Ministria për Kultur Rini dhe Sport”, tha Sylejmani.

Sipas tij, është ngjarja më e madhe dhe që do sjell edhe emocione në mesin e dashamirëve të këtij sporti. “Kjo është ngjarja më e madhe nga sporti në Kosovë. Kjo garë startin e ka te Teatri Kombëtar, ne kemi bërë të pamundurën ta organizojmë këtë garë për të treguar që në Kosovë organizohen edhe ngjarje të mëdha”, thotë Sylejmani. 

Hyzri Bunjaku, udhëheqës i sektorit të sportit në Komunën e Prishtinës, thotë se komuna gjithherë ka qenë në mbështetje të këtij organizimi, ndërsa Adrian Mazreku, përfaqësues i mediave, ka thënë se shpërblimi kryesor i kësaj maratone do të jetë 500 euro.

Shpërblimet për Maratonë: vendi i parë 500 euro, i dyti 400, i treti 300, i katërti 150, i pesti 120, i gjashti 100, i shtati 70 dhe i teti 50 euro.

Gjysmë Maratona, i pari 250 euro, i dyti 200, i treti 150, i katërti 100 dhe i pesti 50 euro.

Në maratonë merr pjesë edhe Bekim Murati i cili ka përvojë të madhe dhe sipas tij, deri me tash ka marrë pjesë në 86 maratona.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat