Përderisa izraelitët janë duke vazhduar për të dymbëdhjetën javë me radhë me protesta masive për kundërshtimin e reformës ligjore të kërkuar nga kryeministri Benjamin Netanyahu, edhe ministri i Mbrojtes së vendit ka kërkuar ndalimin e saj.
Yoav Gallant i ka bërë thirrje kryeministrit Benjamin Netanyahu që të ndalojë planet e diskutueshme për një rishikim të sistemit të drejtësisë, duke thënë se kriza po shkakton trazira sociale dhe mund të dëmtojë sigurinë e Izraelit.
Megjithatë, deri më tani, Netanyahu ka kundërshtuar thirrjet për të hequr dorë nga reforma.
Kujtojmë se ligji është pjesë e një plani të diskutueshëm të qeverisë së djathtë për të kufizuar kompetencat e gjyqësorit, plan që ka çuar në protesta masive prej disa muajsh.
Sipas reformës ligjore të kërkuar nga Netanyahu, parlamentit i ofrohet mundësia e anulimit të vendimeve të marra nga Gjykata e Lartë - një lëvizje që kritikët thonë se do të minojë pavarësinë e gjyqësorit dhe mund të përdoret për qëllime politike.
Megjithatë, Netanyahu thotë se reforma është krijuar për të ndaluar gjykatat të tejkalojnë kompetencat e tyre dhe se është votuar nga publiku në zgjedhjet e fundit.
BBC raporton se kundërshtim ndaj reformës ligjore ka pasur edhe lideri i opozitës Yair Lapid, i cili e ka vlerësuar "hapin e guximshëm" të ministrit të Mbrojtjes për kërkimin e ndalimit të saj.
Në anën tjetër vendi ka votuar një ligj që parandalon Prokurorin e Përgjithshëm që të shkarkojë një kryeministër, duke e bërë të mundur që vetëm vetë kryeministri ose tre të katërtat e kabinetit të mund të vendosin për largimin e kryeministrit nga posti për arsye fizike ose psikologjike.
Kujtojmë se kryeministri izraelit Benjamin Netanyahu është duke u gjykuar me akuzat për ryshfet, mashtrim dhe shkelje të besimit në tre raste. Megjithatë, ai ka mohuar çdo keqbërje duke thënë se është vetëm një “viktimë e një gjuetie shtrigash”.
