​U përurua libri ‘Halit Barani përjetë në udhën e artit dhe lirisë’ i autorit Hysni Syla

Kultura

​U përurua libri ‘Halit Barani përjetë në udhën e artit dhe lirisë’ i autorit Hysni Syla

Më: 5 korrik 2022 Në ora: 18:05
Foto ilustrim

Në shënim të 70 vjetorit të lindjes dhe 50 vjetorit të veprimtarisë së Halit Baranit, sot në Qendrën e Kulturës ‘Rexhep Mitrovica’, në Mitrovicë, u përurua libri i gazetarit, profesorit dhe veprimtarit të ndjerë, Hysni Syla, ‘Halit Barani përjetë në udhën e artit dhe lirisë’.

‘Halit Barani’, i njohur jo vetëm në Mitrovicë, Kosovë e Shqipëri, por kudo në botë ku jetojnë shqiptarët, me veprimtarinë e tij të shumanshme gjysmë shekullore, ka lënë gjurmë të pashlyeshme’. 

Kështu u tha mes tjerash gjatë përurimit të këtij libri, ku autori Hysni Syla lëndën e ka strukturuar në shtatë kapituj, ‘Telegrame urimi’, ‘Miqtë për të përjetshmin Halit Barani’, ‘Mendime, vlerësime, mirënjohje’, ‘Thërrmija kujtimesh’, ‘Dymbëdhjetë vjet punë për dy ditë dëshmi në Hagë’, ‘Mbretëria e Talas’ dhe ‘Album fotografish’.

Profesori Miftar Kurti, recenzent i librit, tha se autori i këtij libri, gazetari dhe veprimtari i palodhshëm Hysni Syla, nuk është rastësi që ka vendosur të shkruaj për Halitin, sepse e ka njohur mirë.

Kurti: Autori ka bashkëvepruar me protagonistin

‘Dhënia e idesë për shënimin e këtyre dy jubileve dhe përgatitja e këtij libri nga Hysni Syla, për mua nuk përbënë befasi, sepse autori e ka njohur mirë protagonistin, e ka pasur mik, shpesh e ka shoqëruar dhe ka bashkëvepruar me të’, ka thënë Kurti.

Ish-ambasadori i Kosovës në SHBA, Avni Spahiu, pasi u shpreh i nderuar për prezencën e tij në këtë përurim, theksoi se gjatë viteve të 90-ta, Haliti së bashku me Hysniun ishin burim i pashtershëm i informimit dhe i pasqyrimit të situatës së rëndë në Kosovë.

Spahiu: Haliti e Hysniu janë meritorë që e vërteta për Kosovën mori përmasa më të gjera

‘Më kujtohet gjatë viteve të 90-ta kur ne punonim në kushte shumë të rënda, Haliti ishte një burim i pashtershëm i informimit për dhunën që ushtrohej mbi popullin e Kosovës, po ashtu edhe Hysniu për shkrimet e veta. Ata janë meritorë që e vërteta për Kosovën mori përmasa më të gjera, madje edhe botërore’, tha ai.

Hysen Ibrahimi, kryetar i Shoqatës së shkrimtarëve shqiptarë në Suedi, tha se edhe pse Hysni Syla nuk jeton më, veprat e tij flasin shumë.

Ibrahimi: Veprat e Halitit sot flasin më shumë se gjithçka’

‘Hysni Syla nuk gjendet më fizikisht në mesin tonë, por veprat e tij sot flasin më shumë se gjithçka’, potencoi Ibrahimi.

Ndërkaq, ish kryetari I Mitrovicës, Agim Bahtiri, duke folur për autorin e librit, tha se ai ka qenë punëtor i shkëlqyeshëm dhe i palodhshëm.

Bahtiri: Ai ka bërë një punë të shkëlqyeshme

‘Bacin Hys siç e quanim ne e kam pasur shtatë vite në kabinetin tim, dhe ai ka bërë një punë të shkëlqyeshme, cilësore dhe njerëzore, pa u lodhur asnjëherë’, u shpreh Bahtiri

Prend Buzhala, tha se autori i librit, Hysni Syla, si dhe protagonisti Halit Barani, janë kronikë e gjallë e qytetit të Mitrovicës.

Buzhala: Halit Baranit dhe Hysni Sylës janë kronikë e gjallë e qytetit të Mitrovicës

‘Një Mitrovicë pa emrin e Halit Baranit dhe Hysni Sylës ku do të ishte…Që të dy këta njerëz, njëri që është në përjetësi dhe tjetri që është këtu i pranishëm, janë kronikë e gjallë e qytetit të Mitrovicës’, tha ai.

Në emër të familjarëve të autorit të këtij libri, ka folur Gazmend Syla, i cili evokoi kujtime nga e kaluara, Ai ka përmendur punën e palodhshme ndër vite të axhës së tij, në të mirë të të gjithë qytetarëve pa dallim.

Syla: E kam pyetur vetën 1 milionë herë se ku e gjenë atë vullnet 

‘E kam pyetur veten një milion herë ku e ka gjetur tërë atë vullnet dhe kohë me punu për njerëz pa pasur ndonjë përfitim’, tha ai.

Në anën tjetër, emocione të forta e kanë përshkuar vetë protagonistin e librit, Halit Barani, i cili tha se përulet përjetësisht para veprave të Hysni Sylës.

Barani: I përulem veprës së Hysni Syla

‘E falënderoj përjetësisht dhe i përulem..Hysni Syla nuk është vetëm fizikisht me ne, por ai është në mesin tonë kudo’, u shpreh Barani. 

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat