Mbrëmja më e madhe e ndarjes së çmimeve të muzikës në Francë, NRJ Music Awards 2022, do të mbahet më 18 nëntor. Organizatorët kanë publikuar listën e plotë të të nominuarve për edicionin 2022 të skemës prestigjioze të çmimeve.
Të nominuara në këtë mbrëmje çmimesh janë edhe dy artistet shqiptare me famë ndërkombëtare: Bebe Rexha dhe Ava Max. Kjo e fundit garon për të fituar çmimin në kategorinë “Artistja më e mirë ndërkombëtare e vitit”.
Ndërkohë Bebe Rexha është e nominuar për dy çmime: “Kënga më e mirë e vitit” dhe “Ripërpunimi më i mirë i vitit”, për këngën e saj “I’m good (Blue)” në bashkëpunim me David Guettan. Kujtojmë që deri më tani e vetmja artiste shqiptare që ka fituar një çmim NRJ është Dua Lipa.
