Dashuria 1-dekadëshe e çiftit George dhe Amal Clooney (ata yjet super të dashuruar që thonë se s'janë zënë një ditë në jetën e tyre) thuhet se po shkon drejt fundit të saj.
Burimet afër çiftit kanë thënë për gazetat e huaja se dyshja po e mendojnë seriozisht divorcin, i cili meqë ra fjala, është shumë i kushtueshëm, me gjithë kuptimin e fjalës.
Vetëm para pak ditësh megjithatë, George Clooney përforcoi në një intervistë të tijën për CBS-s deklaratën e pabesueshme se ai dhe gruaja e tij vazhdonin të mos kishin bërë as edhe një sherr gjatë gjithë martesës së tyre.
Por, burime anonime kanë pak muaj që shpërndajnë fjalë për "tensione" të vazhdueshme mes Amal-it dhe George Clooney-t. Detaji që i shtoi edhe më shumë këto aludime është fakti se Amal-i nuk mori pjesë në debutimin e Clooney-t në Broadway, në shfaqjen teatrale "Good Night & Good Luck". Kjo, jo pa shkak sipas burimeve, por sepse çifti i famshëm po lëviz me shpejtësi "drejt një divorci prej 500 milionë dollarësh".
Mungesa e Amal-it në shfaqjen e bashkëshortit të saj ishte një "shok" për shumë njerëz, pasi nuk ka ndodhur që ajo të mungojë në të tilla ngjarje të rëndësishme. George megjithatë, e justifikoi mungesën e saj duke pohuar se Amal ishte me binjakët e tyre 7-vjeçarë.
Zhgënjimi i Amal-it përflitet të ketë ardhur nga përpjekja e George Clooney-t për të zhvendosur familjen e tyre në New York City, me qëllimin për të ndjekur karrierën e tij të ëndrrave në Broadway. Amal e anashkaloi natën e premierës si një "shenjë e qartë" e mosmarrëveshjes së saj me zhvendosjen e tyre.
Prindërit e dy fëmijëve fillimisht kishin "rënë dakord që ajo dhe fëmijët të qëndronin në Europë dhe ai të udhëtonte herë pas here". Megjithatë, aktori e bindi Amal-in të zhvendoseshin, gjë që ajo e bëri, por "pa qenë e vendosur". Kjo më pas shkaktoi "shumë tension" në martesën e tyre, gjithmonë sipas raportimeve të burimeve.
Megjithatë, pavarësisht nga thashethemet e fundit, çifti Clooney u dukën të bashkuar muajin e kaluar teksa ecnin rrugëve të New York-ut të kapur dorë për dore.
