Daily Mail publikoi një video të fshehtë, ku mjekët kinezë pranojnë se kishin informacione për koronavirusin por qeveria kineze kishte urdhëruar të mbahej i fshehtë.
Mjekja shqiptare në Itali, Eni Dragoti thotë se edhe Europa kishte informacione për virusin e ri por në fillim heshti. Këtë ajo e shpjegon me interesat ekonomikë. “Në Kinë ka fabrika që prodhojnë për të gjithë botën. Kina nuk donte ta bënte publike sepse i interesonte t’i thoshte botës se akoma po punon dhe shumë informacione janë lënë në errësirë edhe për faj të Europës. I interesonte për shkak të krahut të punës që ka në Kinë”.
Sipas mjekut Florim Cuculi, pas publikimit të kësaj video, studimet e mjekësisë kineze duhet parë me rezerva.
“Duhen marrë me dyshim sepse ata e kanë ditur se për çfarë bëhet fjalë. Të kemi kujdes nga kinezët sepse gënjyen botën! Nuk duhet t’i besojmë studimeve kinezë siç i kemi besuar më parë. A duhet t’i besojmë vaksinës, medikamenteve kinezë? Me kinezët nuk duhet bërë shaka”.
Megjithatë, Dragoti shton se Kina ka bashkëpunuar me shtetet e tjera në studimin e SARS 2. “Direkt nga laboratori kinez erdhën epruvetat e para për t’u studiuar nga laboratorët në Europë. Bashkëpunimi midis shteteve përshpejtoi procesin e njohjes me virusin dhe më vonë në prodhimin e vaksinave, që është arritje për të gjithë”.
