Mediu: Fatin e Shqipërisë nuk mund ta vendosin Vuçiç dhe Zaev, marrëdhënia e tyre me Ramën nuk është e rastësishme

Shqipëria

Mediu: Fatin e Shqipërisë nuk mund ta vendosin Vuçiç dhe Zaev, marrëdhënia e tyre me Ramën nuk është e rastësishme

Më: 22 prill 2021 Në ora: 12:16
Fatmir Mediu

Kandidati nr.7 i PD-AN në Tiranë, Fatmir Mediu në një nga takimet përmbyllëse në Tiranë ka folur për mesazhet që kanë dhënë kryeministri maqedonas, Zaev dhe Presidneti serb, Vuçiç për zgjedhjet në Shqipëri.

Mediu i konsideron mesazhet e tyre si mbështetje për Ramën, por thotë se për fatin e Shqipërisë nuk mund të vendosin Vuçiç e Zaev.

Ai thotë se lidhja e Ramës me ta nuk është e rastësishme, pasi janë instrumenta për të defaktorizuar rolin e shqiptarëve.

FJALA NGA FATMIR MEDIU

Si ka mundësi që Edi Ramës i del në krah dhe i kërkon shqiptarëve që të votojnë Edi Ramën, Presidenti serb Vucic, ai që ishte zëdhënësi i Miloshevicit në masakrën në Kosovë?

Si ka mundësi që ne si shoqëri të mos reagojmë në raport me atë shtet, me ata njerëz, të cilët kanë dashur të defaktorizojnë qëllimet dhe interesat shqiptare? Kjo nuk është e rastësishme, që Vucic dhe Zajev duan Ramën, sepse janë tashmë instrumenta për të defaktorizuar rolin e rëndësishëm që fituan shqiptarët në fillim shekulli, me ndërhyrjen e NATO-s në Kosovë, Pavarësinë e Kosovës, Shqipërinë në NATO, liberalizimin e vizave, Marrëveshjen e Ohrit, të drejtën shtetformuese të shqiptarëve në Maqedoni, afrimin me Bashkimin Europian të shqiptarëve në Malin e Zi.

Kjo marrëdhënie nuk është e rastësishme. Kjo rrymë po përpiqet edhe njëherë të minojë çdo interes shqiptar.

Është hera e parë në historinë e këtyre 30 viteve që Brukseli flet hapur dhe qartë, thotë votoni numrin 9, “aleancën për Ndryshim”, por duhet të kuptojmë që jo vetëm shqiptarët, por edhe partnerët tanë në SHA dhe Europë, janë tashmë të lodhur me një qeverisje, e cila vetëm mashtron, një qeverisje e cila vetëm shkatërron, një qeverisje e cila ka mbjellë vetëm korrupsion, një qeverisje e cila ka mbjellë vetëm krim.

Edi Rama mendon që mund të blejë të ardhmen e fëmijëve tanë, mund të blejë mundin dhe djersën e prindërve tanë, mund të blejë dinjitetin tonë, por ne duhet të bashkohemi si asnjëherë tjetër, t`i themi që fëmijët tanë, jeta jonë, e ardhmja jonë, mundi i prindërve tanë, dinjiteti ynë, as nuk shitet, as nuk blihet. Ai është për ne për të ndërtuar lumturinë në këtë vend që e ka falur Zoti.,

Edi Rama si askush tjetër në historinë shqiptare, nuk mund të krahasohet me asnjë. Njeri i cili shan, fyen, përbuz çdo njeri të ndershëm, njeri i cili nuk do të dijë për asnjë vlerë njerëzore, politikë nuk ka më, qeverisjen e ka shkatërruar, por do të shkatërrojë dhe atë që është thelbësore në një shoqëri, respektin dhe vlerësimin dhe dashurinë për njëri-tjetrin.

Prandaj mendoj që është shumë e rëndësishme që urrejtjen, përbuzjen e Edi Ramës, ta kthejmë në dashuri dhe respekt për njëri-tjetrin.

Ne si republikanë besojmë në Zot, por besojmë dhe tek ajo shprehja e famshme “se feja e shqiptarit është shqiptaria”, se pa qenë shqiptar, nuk mund të jesh besimtar, se pa qenë shqiptar nuk mund të jesh krenar, se pa qenë shqiptar nuk mund të bësh dot atë ë ne të gjithë kemi besuar dhe ëndërruar, Shqipërinë Europiane.

Në datën 25 Prill shikoni fëmijët tuaj dhe bëjini një pyetje vetes; a është kjo që keni pritur dhe ëndërruar? A kanë fëmijët tanë, fëmijët tuaj mundësinë për t`u edukuar dhe arsimuar dhe ndërtuar një familje në Shqipëri? Shikoni veten tuaj, burrë e grua; a jemi njerëz që vendosim për fatin tonë?

Prandaj motra dhe vëllezër duhet të besoni tek vetja juaj, tek këta të rinj dhe të reja që janë e ardhmja, jo vetëm e Partisë Republikane, por e gjithë Shqipërisë, këta që mund ta ndërtojnë dhe do ta ndërtojnë Shqipërinë Europiane

Prandaj 25 Prilli është një moment jashtëzakonisht i rëndësishëm. Le të dalim edhe njëherë, ashtu siç kemi dalë në vitet `91-`92, për të shembur diktaturën komuniste dhe kësaj radhe të shembin diktaturën e krimit dhe korrupsionit, të drejtuar nga Edi Rama. Diktatura e krimit dhe korrupsionit nuk ka vend tek shqiptarët. Njerëzit e krimit dhe korrupsionit nuk mund të drejtojnë shqiptarët.

Prandaj në emër të punës, në emër të familjes, në emër të zhvillimit ekonomik, në emër të të ardhmes sonë si komb, të ardhmes sonë europiane, ju ftoj që në 25 Prill të dalim që të gjithë motra dhe vëllezër, të gjithë në një festë të madhe dhe të votojmë numrin 9, “Aleancën për Ndryshim”.

Numri 7 nuk është Fatmir Mediu, numri 7 janë këta të rinj dhe të reja, është historia e Partisë Republikane, është historia e të djathtës shqiptare dhe do të jetë padiskutim zëri juaj në Kuvendin e Shqipërisë, jo vetëm për debate boshe, por për hallet dhe problemet që kanë njerëzit.

Shfaq komentet
comments powered by Disqus
Sot mund të lexoni Shfletoni kopertinat