Prokuroritë e rretheve janë përfshirë nga një valë transferimesh të prokurorëve dhe drejtuesve, pasi anëtarët e Këshillit të Lartë të Prokurorisë, kanë vendosur të miratojnë 17 ndryshime.
Kryesisht janë prekur prokurorë që ushtrojnë funksionin e tyre pranë prokurorive të Durrësit, Korçës, Tiranës, Shkodrës, Krujës dhe Elbasanit.
I pari që ka lëvizur, është prokurori i Shkodrës Xhevahir Lita, i cili kohët e fundit ishte angazhuar në hetimin e vrasjes me 79 plumba të Bardhok Planaj në Dobraç të Shkodrës.
Lita, është transferuar në prokurorinë e Tiranës. Ndërsa prokurori i Tiranës, Etien Kapo, është larguar pas shumë vite në detyrë në këtë institucion, duke u emëruar si prokuror pranë prokurorisë së Apelit në Durrës.
Në të njëjtën prokurori, është transferuar dhe prokurori, Elvin Gokaj, i cili kaloi me sukses verifikimin në vetting dhe më pas shërbeu si prokuror Apeli në Shkodër.
Gokaj, transferohet tashmë në Apelin e Durrësit, për të vijuar dhe përfaqësuar akuzën në gjyq pranë Gjykatës së Apelit Durrës.
Në Apelin e Shkodrës, emërohet në krye të prokurorisë Lazer Çardaku. Anëtarët e KLP, kanë larguar nga posti i drejtimit të prokurorisë së Lezhës, prokurorin Milan Laska, i cili është transferuar si prokuror i thjeshtë, në prokurorinë e Tiranës.
Në vendin e drejtuesit të prokurorisë së Lezhës, është caktuar prokurori, Erjon Shehu. Një tjetër emër që “braktis” prokurorinë e Lezhës është, Arben Agovi, i cili transferohet në prokurorinë e Tiranës.
Kësaj prokurorie i bashkohet dhe magjistratja, Ornela Rrumbullaku, që më parë ka shërbyer pranë prokurorisë së Kavajës.
Nga Kavaja është larguar dhe Edina Kurti, e cila është transferuar në prokurorinë e Durrësit.
Për shkak të vendeve vakante në prokurorinë e Tiranës është transferuar dhe prokurorja e Lushnjës, Rovena Bozo.
Ndërsa, vendin e saj në Lushnjë e zë, Edmond Karriqi, i cili është transferuar në këtë detyrë nga prokuroria e Kukësit.
Por pavarësisht këtij transferimi, Karriqi është komanduar nga KLP si drejtuesi i prokurorisë së Kukësit, për periudhën nga 27 prilli deri në 26 tetor 2021.
Nga posti i drejtuesit është larguar dhe prokurori i Vlorës, Erion Çela, i cili është emëruar prokuror pranë prokurorisë së Apelit në Vlorë.
Njëherësh postin e drejtuesit e ka “braktisur” dhe prokurori Artur Ismailukaj, i cili drejtonte prokurorinë e Tropojës. Ismailukaj, është transferuar në prokurorinë e Elbasanit si prokuror i thjeshtë.
Prokurorisë së Elbasanit, i është bashkuar dhe prokurori Ervin Beqiri, i cili më parë ka shërbyer në prokurorinë e rrethit të Korçës.
Postin e drejtimit të prokurorisë së Beratit e ka lënë dhe Gentian Abazaj, i cili është transferuar nga KLP-ja pranë prokurorisë së Elbasanit.
Gjithashtu, një emër tjetër që ka lëvizur është prokurori Saimir Bahiti, i cili është larguar nga Kukës, duke u afruar në prokurorinë e Durrësit.
Nga Berati është larguar dhe Olgert Romnici, i cili është transferuar në prokurorinë e Krujës.
Lista e transferimeve
1. Xhevahir Lita, nga Shkodra në Tiranë
2. Bajram Breçani nga Elbasani në Tiranë
3. Etien Kapo nga Tirana në Apelin Durrës
4. Erion Çela nga drejtues në Vlorë në Apelin Vlorë
5. Artur Ismailukaj nga drejtues në Tropojë në Elbasan
6. Ervin Beqiri nga Korça në Elbasan
7. Milan Laskaj nga drejtues në Lezhë në Tiranë
8. Rovena Bozo nga Lushnja në Tiranë
9. Elvin Gokaj nga Apeli në Shkodër në Apelin në Durrës
10. Olgert Rumnici nga Berati në Krujë
11. Edina Kurti nga Kavaja në Durrës
12. Edmond Karriqi nga Kukësi në Lushnjë. (Komandohet drejtues në Kukës)
13. Gentjan Habazaj nga Berati në Elbasan
14. Saimir Bahiti nga Shkodra në Durrës
15. Ornela Rrumbullaku nga Kavaja në Tiranë
16. Arben Agovi nga Lezhë në Tiranë
17. Lazer Çardaku nga Shkodra në Apelin e Shkodrës
