E plotësuar (15:09) - Ish-Kryeministri Sali Berisha i është përgjigjur Kryeministrit Edi Rama, i cili pak më parë në një komunikim online ftoi demokratët që të bashkohen dhe të shpëtojnë opozitën.
Berisha në një deklaratë për mediat para selisë së PD, tha se me këtë deklaratë Rama faktoi se ka futur në xhep Lulzim Bashën. Ai tha se tashmë ky i fundit është i shkarkuar nga të gjitha funksionet.
Berisha: Me këtë akt fakton se ka futur në xhep Bravën dhe mendon se ka arritur ti caktojë PD kryetarin me policë. Deputetët janë anëtarët parësor të grupit parlamentar. Basha nuk ka asnjë fuqi, është I shkarkuar nga të gjitha funksionet.
***
Ish-kryeministri Sali Berisha është zotuar jashtë selisë së Partisë Demokratike se asgjë nuk do ta pengojë dhe ndalojë në vazhdimin e kësaj beteje.
Një ditë pas protestës së dhunshme, Berisha denoncon se janë bërë lista dhe janë arrestuar e ndaluar demokratë, që sipas tij, nuk kanë kryer asnjë lloj akti dhune.
“Erdha këtu për t’u zotuar se asgjë nuk mund të pengojë dhe ndalojë konsolidimin e pluralizimit politik në Shqipëri. Asgjë nuk do të mund të ndalojë mbizotërimin e vullnetit të shumicës në këtë vend. Asgjë nuk mund të pengojë këtë revolucion paqësor në realizimin e objektivave historike të tij. Gjithashtu, dua të shpreh solidaritetin tim, mirënjohjen e pakufishme, ndaj atyre demokratëve e demokrateve që u arrestuan mbrëmë me listat e dala nga ai që shqiptarët po i thonë “jo, Lulzim, por Lulzi”.
Në një bashkëpunim të ethshëm me narkopolicinë e Edi Ramës, mbrëmë pas përfundimit të protestës janë formuluar lista dhe janë arrestuar, ndaluar, demokratë, që nuk kishin kryer në mënyrë absolute asnjë lloj akti, për të cilin duan t’i bëjnë përgjegjës. Kjo është një histori tjetër turpi e Lulzim Bravës, e bashkëpunimit të tij si një vegël e Edi Ramës. Gjatë këtyre orëve unë kam marrë me dhjetëra e qindra mesazhe nga demokratët, të cilët janë jashtëzakonisht të inkurajuar në vazhdimin e kësaj beteje, të cilët përjetuan skena që kalonin imagjinatën e tyre”, u shpreh Berisha.
