Ministri i Drejtësisë, Ulsi Manja deklaroi dje se gjatë vitit 2022, SPAK i ka kushtuar vëmendje të veçantë hetimit të veprave penale që lidhen me korrupsionin e zyrtarëve të lartë, duke u fokusuar kryesisht në sektorin e fondeve publike. Gjatë raportimit në Komisionin parlamentar të Ligjeve, Manja foli mbi punën e kryer nga SPAK dhe Prokuroria e Përgjithshme gjatë vitit 2022.
Manja tha se vihet re një rritje e hetimit të çështjeve përsa i përket krimit të organizuar.
“Ne inkurajojmë Prokurorinë e Posaçme që fokusi i saj të orientohet edhe në drejtim të luftës kundër krimit të organizuar edhe aseteve të tij, edhe pse ka përparim të dukshëm të sekuestrimit të aseteve nga krimi”, tha ai.
Ministri kërkoi që të shihet me një këndvështrim tjetër lufta kundër krimit të organizuar, pasi ka një impakt të rëndësishëm edhe në rritjen e besimit të opinionit publik te sistemi i drejtësisë. Lidhur me garantimin e pavarësisë dhe përgjegjshmërisë së prokurorit në ushtrimin e ndjekjes penale dhe hetimit, Manja theksoi se është forcuar kontrolli i prokurorëve mbi oficerët e Policisë Gjyqësore.
“Në vitin 2022 është rritur edhe numri i hetimeve proaktive. Në luftën kundër korrupsionit Prokuroria e Përgjithshme dhe SPAK ka rritur rolin aktiv si përmes hetimeve të filluara ashtu edhe me kryerjen e hetimeve proaktive dhe me përdorimin e mjeteve të posaçme të hetimit për veprat penale në fushën e korrupsionit”, tha ai. Manja theksoi se për vitin 2022 ka rritje të konfiskimeve të vendosura nga gjykata mbi asetet e krimit të organizuar, me kërkesë të prokurorit
. “Janë 167 procedime të regjistruara në fushën e krimit të organizuar. Nuk ka rritje në krahasim me vitin 2021, janë vetëm 3 procedime më shumë”, tha ai. Për sa i takon veprave penale kundër terrorizmit, Manja tha se ka një ulje të numrit të çështjeve të regjistruara me 8 çështje më pak.
