Kryekomisari Stiljan Pasho, i akuzuar për trafikim droge, ka dalë këtë të diel para gjykatës së Korçës. Pasho, me detyrë Shef i Sektorit të Kufirit në Drejtorinë Vendore për Kufirin dhe Migracionin Korçë, u përjashtua nga Policia e Shtetit pas arrestimit të tij nën akuzën e trafikut të drogës.
Pasho ra në pranga pasi, duke përdorur detyrën e tij, ka ndihmuar Lorenc Likën që të kalojë 26 kg drogë në pikën kufitare të Kapshticës, pa iu nënshtruar kontrollit kufitar në automjetin e tij.
Nga hetimet rezultoi se kryekomisari ka shoqëruar Likën për të kaluar mjetin tip “Passat” nga Kapshtica drejt kufirit grek.
Në disa raste, ky punonjës policie ka lëvizur disa herë me mjetin e shtetasit të arrestuar nga policia greke dhe një shtetas tjetër, fakt i provuar edhe nga sistemi Tims dhe kamerat e sigurisë. Nga deklarimet e punonjësve të P.K.K Kapshticë rezulton se ata kanë pranuar se kanë qenë nën presion nga kryekomisari për të mos kontrolluar këtë mjet.
