Nikoll Deda, Fadil Muhameti, Klodjan Zanaj, Ertjen Hysa dhe Shpëtim Dulellari janë pesë të arrestuarit nga Policia e Tiranës gjatë 24 orëve të fundit.
Personat në fjalë ishin shpallur në kërkim më herët nga autoritetet pasi akuzohen për vepra të ndryshme penale. Disa prej tyre janë edhe të dënuar më herët me vendim të gjykatës.
Pesë personat e arrestuar nga blutë e Tiranës akuzohen për mashtrim, armëmbajtje pa leje, shpërdorim detyre dhe ndërtim i paligjshëm.
Njoftimi i Policisë
Në vijim të punës për kapjen e shtetasve të shpallur në kërkim dhe vënien e tyre përpara përgjegjësisë ligjore, Strukturat e DVP Tiranë gjatë 24-orëve të fundit, kapi dhe ndaloi 5 shtetas, konkretisht:
-Specialistët për Hetimin e Trafiqeve të Paligjshme kapën shtetasin N. D., 70 vjeç dhe ekzekutuan masën e sigurisë “Arrest me burg” që i kishte caktuar Gjykata e Tiranës, për veprat penale “Vjedhje e kryer duke shpërdoruar detyrën", "Veprime në kundërshtim me vendimin e gjykatës" dhe "Shpërdorimi i detyrës".
-Specialistët për Hetimin e Krimeve të Komisariatit të Policisë Nr. 1 kapën dhe ndaluan shtetasin K. Z., 43 vjeç, pasi Gjykata e Apelit e ka dënuar me 1 vit burgim, për veprën penale “Mashtrimi”.
-Specialistët për Hetimin e Krimeve të Komisariatit të Policisë Nr. 2 në bashkëpunim me Komisariatin e Policisë Nr. 3 kapën dhe ndaluan shtetasin E. H., 26 vjeç, pasi Gjykata e ka dënuar me 1 vit burgim për veprën penale “Prodhimi, mbajtja, blerja, apo shitja pa leje e armëve të ftohta’’.
Po këta specialistë në bashkëpunim me Seksionin e Kërkimit kapën dhe ndaluan shtetasin F. M., 62 vjeç, pasi Gjykata e ka dënuar me 4 muaj burgim për veprëm penale “Ndërtim i paligjshëm”.
Specialistët për Hetimin e Krimeve të Komisariatit të Policisë Nr. 6 në bashkëpunim me Komisariatin e Policisë Nr. 5 kapën e ndaluan shtetasin Sh. D., 34 vjeç, i shpallur në kërkim për veprën penale “Mashtrimi”.