Ministrja për Europën dhe Punët e Jashtme, Elisa Spiropali, zhvilloi një takim online me ambasadorët shqiptarë të akredituar në vendet e Bashkimit Europian, në kuadër të përgatitjeve për intensifikimin e veprimtarisë diplomatike gjatë fazës së re të procesit integrues.
Takimi, i organizuar si pjesë e koordinimit të rregullt me përfaqësitë diplomatike, u fokusua në përcaktimin e hapave të mëtejshëm për forcimin e komunikimit dhe angazhimit me institucionet e vendeve anëtare të BE-së, si dhe me publikun, median dhe komunitetet shqiptare dhe europiane.
Spiropali theksoi rëndësinë e një komunikimi të qartë e të unifikuar mbi vlerat, potencialin dhe arsyet që e bëjnë Shqipërinë një vend plotësisht të gatshëm për të zënë vendin e saj në tryezën e familjes europiane.
Ajo nënvizoi se diplomacia shqiptare duhet të jetë më aktive, më e pranishme dhe më e koordinuar në përçimin e mesazheve strategjike për reformat, progresin dhe rolin konstruktiv të Shqipërisë në rajon dhe në Evropë.
Në postimin e saj pas takimit, Spiropali theksoi:
“Intensifikimi i veprimtarisë diplomatike me vendet e BE është thelbësor. Në këtë takim periodik me ambasadorët shqiptarë u koordinuam për hapat e mëtejshëm të angazhimit dhe komunikimit me institucionet e këtyre vendeve, por edhe me publikun, median dhe komunitetet, për vlerat, potencialin dhe të gjitha arsyet pse Shqipëria meriton vendin e saj në tryezën e familjes europiane.”
Takimi konsiderohet një pjesë e rëndësishme e përpjekjeve të Shqipërisë për të rritur ndërveprimin diplomatik me partnerët europianë, në një moment kyç të procesit të integrimit.
