Ministri në detyrë i Bujqësisë, Besian Mustafa ka folur pas skandalit ku u arrestuan 12 zyrtarë të Agjencisë për Zhvillimin e Bujqësisë, për keqpërdorim të subvencioneve.
Mustafa tha se gjatë takimeve që ka pasur me fermerët ata janë ankuar se ka pa rregullsi në ndarjen e subvencioneve.
Ai tha se këtë shqetësim të fermerëve e kishte ngritur me kryeshefin e AZHB’së, Agim Nuha i cili u arrestua në aksionin e policisë.
“Në disa raste më është thënë shih se kemi probleme dhe i kam thënë lajmërojeni policinë dhe organet hetuese…”, tha ai.
Po ashtu, ai tha se ka suspenduar të gjithë zyrtarët në ministrinë e tij, që kanë pasur aktakuzë të konfirmuar nga Prokuroria e Shtetit.
Ai tha se për një vit kanë bashkëpunuar me Prokurorinë dhe se është krenar që bashkëpunimi i tyre ka pasur suksese.
Ndryshe në aksionin e policisë të para disa ditëve u arrestuan 12 zyrtarë dhe u konfiskuan mbi 400 mijë euro.
