Raporti amerikan për Ujmanin, reagon Avdullah Hoti

Aktuale

Raporti amerikan për Ujmanin, reagon Avdullah Hoti

Më: 23 qershor 2021 Në ora: 20:11
Avdullah Hoti

Ish-kryeministri i Kosovës, Avdullah Hoti ka reaguar pas publikimit të raportit për menaxhimin e Liqenit të Ujmanit, e që ishte një nga zotimet e Marrëveshjes së Washingtonit të nënshkruar më 4 shtator në Shtëpinë e Bardhë.

Hoti përmes një postimi në Facebook ka kërkuar nga Qeveria  të kërkoj falje për marrëveshjen e Uashingtonit, duke kërkuar që të kujdesen për realizimin e projekteve që burojnë nga kjo marrëveshje.

“Ata që nuk lanë gjë pa thënë për këtë studim dhe për gjithë marrëveshjen e Washingtonit, të cilët sot janë disa në Qeveri e disa në opozitë, duhet së paku të kërkojnë falje. Iu pata thënë të mos nguten. Koha po nxjerrë në dritë të gjitha të vërtetat, si dhe të gjitha mashtrimet elektorale e politike”,ka shkruar Hoti ndër të tjera.

Postimi i tij i plotë:

A e cenon sovranitetin e Kosovës studimi i fizibilitetit për liqenin e Ujmanit, i përgatitur nga mbrojtësi më i madh i sovranitetit të Kosovës (SHBA), që u publikua sot?!

Ata që nuk lanë gjë pa thënë për këtë studim dhe për gjithë marrëveshjen e Washingtonit, të cilët sot janë disa në Qeveri e disa në opozitë, duhet së paku të kërkojnë falje. Iu pata thënë të mos nguten. Koha po nxjerrë në dritë të gjitha të vërtetat, si dhe të gjitha mashtrimet elektorale e politike.

Ata që tani janë në Qeveri DUHET të kujdesen për realizimin e projekteve që burojnë nga Marrëveshja e Washingtonit: projektet e hekurudhave dhe autostradave, energjisë së ripërtërishme, furnizimit me gaz, si dhe krijimin e mundësive për financim për bizneset private të Kosovës në tregje financiare të SHBA-së. Ndryshe nuk do ta kenë të gjatë, siç nuk e patën të gjatë as vitin e kaluar.

Administrata e Presidentit Biden e ka konfirmuar se do të vazhdojë të realizojë këtë marrëveshje, sepse eshtë në përputhje me interesat e përbashkëta të SHBA-së dhe Kosovës.

Por, Kosova nuk po ndërmerr asnjë veprim konkret. Asgjë nuk është bërë që nga përmbyllja formale e njohjes nga Izraeli në fillim të shkurtit, të cilën njohje gjithashtu e kritikonin dhe nuk e besonin se do të formalizohet me vendosje të marrëdhënieve diplomatike.

commentFirst article
Sot mund të lexoni Shfletoni kopertinat