(E plotësuar 16:45) - Përfundon dëgjimi i dëshmitarit të tretë në gjykimin e Salih Mustafës
Ka përfunduar dëgjimi i dëshmitarit të tretë të Zyrës së Prokurorit të Specializuar në rastin e Salih Mustafës. Në fund, ai iu është përgjigjur pyetjeve të trupit gjykues ku ndër të tjera ka thënë se, përveç në ditën e parë, nuk i kujtohet të ketë dëgjuar komandant Calin të jap urdhër për keqtrajtimin e tij. Megjithatë, dëshmitari i mbrojtur ka thënë se në të shumtën e rasteve rrahja i është bërë në praninë e komandant Calit.
Dëshmitari W01679 i ka thënë kryetares së trupit gjykues, Mappie Veldt-Foglia, që komandant Cali e ka rrahur kur është dërguar në objektin e Zllashit, ndërsa në ditët e tjera, sipas tij, është rrahur nga të tjerët por shpesh në praninë e tij.
Mappie Veldt-Foglia: Në të rrahurat e tjera ku the që ishte i pranishëm a të ka rrahur edhe ai?
Dëshmitari: Jo në rrahjet e tjera nuk më ka rrahur ai, ka mund të jetë aty por nuk më ka rrahur, ai ka shikuar, ka bërë shaka, ai në fillim më ka rrahur veç, tjera herë nuk më ka rrahur por më kanë rrahur shokët e tij.
Gjatë seancës, kryetarja e trupit gjykues i ka prezantuar dëshmitarit edhe disa fotografi, të cilat nuk ishin publike, dhe e ka pyetur nëse i njeh personat në ato fotografi.
Sipas dëshmitarit, njëri nga personat në fotografi ngjan me komandant Calin.
Gjatë dhënies së dëshmisë, ndër të tjera dëshmitari ka thënë se në objektin, që ai thotë të ketë qenë ahur ku pretendon se është mbajtur, janë sjellë edhe persona të tjerë për disa ditë por që disa i kanë larguar pastaj.
Dëshmitari: Gjashtë persona kemi qëndruar më së shumti në mbajtje në Zllashë
“Kemi qenë gjashtë, më së shumti shtatë por ai i shtati nuk ka qëndruar shumë, ne gjashtë vetë kemi qëndruar më së shumti”, ka thënë dëshmitari i mbrojtur.
Tutje, kryetarja e trupit gjykues e ka pyetur dëshmitarin nëse komandant Cali ka dhënë urdhra për keqtrajtimin e tij.
Veldt-Foglia dhe dëshmitari W01679 (2)
Mappie Veldt-Foglia: Më herët të bëra një pyetje lidhur me komandant Calin që ka qenë i pranishëm gjatë disa prej rrahjeve, pas rrahjes së parë, dhe pyetja që kam për ty, pyetja vijuese është kjo: a ka dhënë ai urdhra për mënyrën si të kanë keqtrajtuar?
Dëshmitari: Më kanë rreh edhe në prezencë të tij, normal se për ata njerëz ka komanduar ky njeri.
Mappie Veldt-Foglia: A e dëgjove veti ti atë të jepte urdhra?
Dëshmitari: Nuk më kujtohet në këto çaste se ka dhënë ndonjë urdhër drejtpërdrejti, përveç herës së parë.
Mappie Veldt-Foglia: Apo mban mend që t’i ketë nxitur, inkurajuar në një farë mënyre?
Dëshmitari: Nuk mbaj mend se nuk ke guxuar edhe me nxit diçka, me bë diçka.
Me këtë ka përfunduar dëgjimi i dëshmitarit të tretë të ZPS-së, ndërsa më 12 tetor do të fillojë dëshminë dëshmitari i katërt.
Dëshmitari i parë i mbrojtur ka dëshmuar nga data 20 deri më 23 shtator, ndërsa dëshmitari i dytë ka dëshmuar nga 23 deri më 27 shtator, ndërsa dëshmitari i tretë është dëgjuar për dy ditë më radhë. Të gjithë nën masa mbrojtëse të sigurisë.
I akuzuari, Salih Mustafa ka marrë pjesë në seancë përmes video-lidhjes.
Ky është gjykimi i parë që ka filluar në Dhomat e Specializuara të Kosovës në Hagë e Salih Mustafa është i arrestuari i parë nga Specialja.
Aktakuza ndaj Mustafës është konfirmuar më 12 qershor të vitit 2020 ndërsa ai u arrestua më 24 shtator të vitit të kaluar, me pretendimin për krime lufte.
Në deklarimin e tij para trupit gjykues, Salih Mustafa është deklaruar i pafajshëm.
Dëshmitari përmend edhe dy femra derisa flet për objektin në Zllashë ku pretendon se është mbajtur
Dëshmitari i tretë i Zyrës së Prokurorit të Specializuar në gjykimin e Salih Mustafës, ka thënë se në ndërtesën në të cilën pretendon se është mbajtur kanë qenë edhe dy femra. Dëshmitari ka thënë se ato nuk i kanë bërë pyetje por sipas tij sot vazhdon ta ketë një shenjë si pasojë e njërës nga femrat për të cilat ka thënë se ishin pjesë e grupit aty.
Gjatë seancës së sotme, dëshmitari i mbrojtur W01679 i është përgjigjur edhe pyetjeve të mbrojtjes së Salih Mustafës, avokatit Julios Von Bone.
Avokati Julios Von Bone: Një prej personave që e ke përmendur më herët ishte një femër, kjo femër edhe kjo qëndroi dhe fjeti në të njëjtën ndërtesë me ju?
Dëshmitari: Në të njëjtën ndërtesë ka ndejt, në tjera dhoma ku ta di unë por me ne një dhomë nuk ka ndejt.
Avokati Julios Von Bone: A të kujtohet përafërsisht sa femra kishte në atë shkollë, si rekrutë apo në cilësi të tjera?
Dëshmitari: Nuk më kujtohet, për femra nuk më kujtohet, meshkuj kanë qenë shumë, për femra nuk më kujtohet dhe nuk kemi pasur kontakt me femra.
Avokati: A është e vërtetë që dy femra kanë marrë pjesë në marrjen në pyetje apo gjatë rrahjeve?
Dëshmitari: E di që kanë qenë dy femra aty, njëra bile sot për pasojë vuaj ende kam shenjë prej saj, por nuk na kanë marrë në pyetje ato, na kanë marrë në pyetje këta të tjerët, por ajo në atë rast ndodhi edhe e kam një shenjë prej një femrës aty.
Dëshmitari i ZPS-së, identiteti i të cilin nuk bëhet publik ka folur edhe për kohën gjatë qëndrimit në shkollën e Zllashit ku sipas tij për disa ditë kanë kryer stërvitje me qëllim që të bëhen pjesë e UÇK-së.
Stërvitjet ka thënë se i kanë udhëhequr Adem Shehu dhe Triumfi.
Dëshmitari: Jemi stërvitur nga Adem Shehu dhe Triumfi
“Ke pas drunj, konopë për me u kap me hip në to, ke pas me shku zvarrë, ka pasur drunj me tela, ke shku zvarrë për me u zvarritë, ke pas drunj për me vrapu në ta, ke pas drunj për me bë ushtrime”, ka thënë dëshmitari i mbrojtur.
Ndërsa avokati Von Bone e ka pyetur për personat të cilët dëshmitari pretendon se e kanë dërguar në objektin e mbajtjes në Zllashë.
Avokati Julios Von Bone: Personat me të cilët shkove në Zllash, ata që i përmende më herët, a e di se çka u ndodhi atyre, çka u bë me ta, çfarë detyrash u dhanë atyre?
Dëshmitari: Nuk e di çfarë detyrash u kanë dhënë, pasi jam liruar kur kam shkuar i kam takuar në shtëpi të vet ata më kanë thënë se pasi më kanë marrë mua edhe ata janë larguar prej aty kanë ikur, pas disa ditësh edhe ata ishin larguar, kishin ikë e kthyer në shtëpi të vet.
Sipas dëshmitarit, nga shkolla e deri të objekti ku pretendon se është mbajtur në Zllashë, kanë ecur rreth 20 minuta.
Avokati Julios Von Bone: Atë që ta vendosën në kokë a ta hoqën pastaj nga koka, kur ta hoqën të kujtohet seku ta kanë hequr?
Dëshmitari: Aty poshtë kur më morën më thanë se ka punë diçka komandanti me ty, ka me të pyet diçka, kur shkova aty ma hoqën.
Avokati Julios Von Bone: Në atë çast kur mbërrije aty, ja dije emrin atij komandantit?
Dëshmitari: Aty kur ka filluar me më pyet, aty e kam mësu, edhe e kam ditë që po shkoj me më pyet diçka një komandat, nuk kam ditë kush është komandant as çka, ata më kanë marrë më kanë thënë po të dërgojmë të komandanti ka me të pyet diçka dhe e kam ditë që jam drejtuar drejt atij njeriu e kam ditë që ai është komandant, që paska kërku me folë.
Avokati Julios Von Bone: Këtë komandantin a e përshkruan dot?
Dëshmitari: Nuk po di qysh me ta përshkru?
Avokati Julios Von Bone: Pse nuk e përshkruan dot?
Dëshmitari: Nuk po di qysh me ta përshkru, është i akuzuari yt, po e mbron ti, shumë thjeshtë ka mundur me qenë ndoshta pak më i dobët.
Avokati Julios Von Bone: Dua të kërkoj të na përshkruash personin të cili ne ke parë aty, këtë komandantin?
Dëshmitari: Po, komandanti kish qenë aty ulë, dhe i thanë të tjerët qe ta prunëm komandant këtë, e kish një jakne me lara, të ushtrisë ja nisi me më pyet për çka ke ardhur këtu, unë i tregova kam ardhur me u kyç në luftë me kontribu diçka, aj nisi me ato bërtitmat e veta, me ato sjelljet e veta, jo po rren, jo trego, jo të mbys, dhe u çu më goditi. Të tjerët e vetën çka me bë, tha mbyteni krejt.
Avokati Julios Von Bone: Çfarë ngjyre i kishte ato teshat që i kishte vesh?
Dëshmitari: Jaknen e ka pasur ngjyrë të ushtrisë, nuk ka qenë sikur ata me të zeza, ka qenë uniform tjetër, për tjerat nuk po mundem me ta shpjegu.
Sipas dëshmitarit, komandanti nuk ka qenë i pranishëm në secilën herë që atë e kanë rrahur.
Dëshmitari: Më kanë rrahur dhe më kanë thënë hajn
“Kanë bërë pyetje, a je mendu me na tregu për çka ke ardhur këtu, tani pas një kohe më bënë edhe hajn, ma kthyen hajn, dhe çka kanë dashur, më thjeshtë çka kanë dashtë qysh ju ka konvenu kanë bërë hajgare me njerëz”, ka thënë dëshmitari i mbrojtur.
Pas pyetjeve të avokatit mbrojtës së Mustafës, dëshmitari i tretë do t’u përgjigjet pyetjeve shtesë nga prokuroria.
Salih Mustafa po merr pjesë në këtë seancë përmes video-lidhjes.
Ky është gjykimi i parë që ka filluar në Dhomat e Specializuara të Kosovës në Hagë, e Salih Mustafa është i arrestuari i parë nga Specialja.
Aktakuza ndaj Mustafës është konfirmuar më 12 qershor të vitit 2020 ndërsa ai u arrestua më 24 shtator të vitit të kaluar, me pretendimin për krime lufte.
Në deklarimin e tij para trupit gjykues, Salih Mustafa është deklaruar i pafajshëm.
Dëshmitari: Pas maltretimeve në Zllashë, jam trajtuar nga mjek privat
Dëshmitari i tretë i Zyrës së Prokurorit të Specializuar kundër Salih Mustafës në Hagë ka thënë se si pasojë e maltretimeve që pretendon se i janë bërë në Zllashë, sot vazhdon të përballet me probleme shëndetësore. Megjithatë, para trupit gjykues ai ka thënë se është trajtuar nga mjekë privatë dhe jo në spitale publike në Kosovë.
Derisa u është përgjigjur pyetjeve të mbrojtëses së viktimave Anni Pues, dëshmitari Ë01679 ka thënë se ka dhëmbë artificial meqë sipas tij në Zllashë i janë thyer dhëmbët nga keqtrajtimet që pretendon se i janë bërë.
Dëshmitari: Dhëmbët mi kanë thyer, i kam artificial
“Edhe ashtu mi kanë pas thyer dhëmbët, po edhe shkaku i infeksionit, e bëra operimin e i rregullova dhëmbët. Artificial i kam edhe sot”, ka thënë dëshmitari i mbrojtur.
Në ditën e dytë të dëshmisë së tij në Hagë, ai ka thënë se të gjitha problemet shëndetësore që i ka sot janë pasojë e keqtrajtimit në Zllashë.
Dëshmitari: Pas maltretimeve në Zllashë jam trajtuar nga mjek privat
“Krejt prej Zllashit, por jam munduar më shumë me shku privatë shkaku që ti edhe me shku kështu të mjeku ti nuk ke mujt me i thënë një mjekut që më ka torturuar UÇK-ja ose diçka, dhe më shumë kemi shku në mënyra private, veç me kry punë më thjeshtë se kështu më ka shku më shumë nëpër njerëz privatë, nëpër mjekë privatë, shkaku që ti nuk ke mujt me shku te mjeku me i thënë më ka dëmtu UÇK-ja, sepse të ne është më ndryshe, të ne mentaliteti është ndryshe prej vendeve të Evropës, janë këto gjëra që shumë larg jemi me mentalitet, fatkeqësisht një pjesë e shoqërisë është shumë larg me këtë mentalitet. Me pas shku bën vaki i ke pasur edhe këta duke punuar aty se këta i kanë pasur krejt të uzurpuara ato ambulanta, këta janë kanë vet Zot aty”, ka thënë dëshmitari W01679.
Dëshmitari i tretë i Zyrës së Prokurorit të Specializuar po dëshmon nën masa mbrojtëse të sigurisë, identiteti i të cilit nuk bëhet publik.
Në Hagë po dëgjohet dëshmitari i tretë në rastin e Salih Mustafës
Në Dhomat e Specializuara në Hagë po vazhdon gjykimi i ish-pjesëtarit të Ushtrisë Çlirimtare të Kosovës, Salih Mustafa, nën pretendimin për kryerje të krimeve të luftës. Aty po dëgjohet dëshmitari i tretë i Zyrës së Prokurorit të Specializuar, i cili po dëshmon nën masa mbrojtëse të sigurisë, identiteti i të cilit nuk bëhet publik.
Pas përfundimit të pyetjeve të ZPS-së dje, dëshmitari Ë01679 po u përgjigjet sot pyetjeve të mbrojtëses së viktimave, Anni Pues.
Dëshmitari: Si pasojë e maltretimit që më është bërën ë Zllashë sot kam probleme dhe marr qetësues
“Pasojat që sot i barti unë janë psikike, nuk mundem me flejtë, këto përjetime këto gjëra shumë të rënda, shumë të tmerrshme që i barti edhe sot dhe shpesh herë po duhet me ndejt me qetësues ose diçka...Një film me këqyr ose diçka me luftë, unë kur shkoj në mbrëmje me flejtë unë në gjysmë nate bërtas, falë familjes që e kam dhe më kupton, i ka mësu këta gjëra tash, në gjumë bërtas, zgjohem djersitëm shumë, lloj-lloj gjërash, mi kujton këto zërat e njerëzve, këto sene mi kthen krejt”, ka thënë dëshmitari derisa është pyetur nga avokatja Anni Pues.
Salih Mustafa po merr pjesë në këtë seancë përmes video-lidhjes.
Ky është gjykimi i parë që ka filluar në Dhomat e Specializuara të Kosovës në Hagë, e Salih Mustafa është i arrestuari i parë nga Specialja.
Aktakuza ndaj Mustafës është konfirmuar më 12 qershor të vitit 2020 ndërsa ai u arrestua më 24 shtator të vitit të kaluar, me pretendimin për krime lufte.
Në deklarimin e tij para trupit gjykues, Salih Mustafa është deklaruar i pafajshëm.
***
“Çohna në gjumë bërtas, çohna djersitna shumë”, ishte njëra nga deklaratat që dha dëshmitari i tretë i mbrojtur, W01679, gjatë seancës që po mbahet të martën në gjykimin ndaj Salih Mustafës në Hagë.
Duke u përgjigjur në pyetje të mbrojtëses së viktimave, Anni Pues, dëshmitari i tretë ka rrëfyer për pasojat psikologjike të cilat tha se i bartë edhe sot e kësaj dite nga rrahjet dhe maltretimet që i ndodhën.
“Sot i barti unë janë domethënë psiqikisht kom, s’muj me flejt, sho andrra, sho përjetimet kto gjanat shumë të rënda jon, shumë të tmerrshme që i barti edhe sot. Edhe domethënë shpesh herë po duhet me nejt veç me qetësues ose me diçka”, ka thënë ai.
Ai tutje rrëfeu se zgjohet në mbrëmje duke bërtitur e djersitet shumë gjatë natës.
“Përjetoj për shembull shumë, për shembull ni film me kqyr ose diçka me luftë ose diçka, unë kur të shkoj në mramje me flejt në gjys natës çohna bërtat, fal familjes që e kam që më kupton dhe i ka msu kto gjana, çohna në gjumë bërtas, çohna djersitna shumë, lloj-lloj gjana. Mi kujton kto, zanat e njerëzve, kto sene mi kthen krejt”, ka thënë ai.
Sipas tij, zërat që i dëgjon janë edhe të viktimave, por edhe të njerëzve që e kanë torturuar.
“Të viktimave po, edhe të njerëzve që më kanë torturu. Në atë moment shfaqen ato zanat, ato bërtimat, ato sharjet, ato senet, shfaqën”, ka rrëfyer dëshmitari i tretë i mbrojtur.
Gjykimi ndaj ish-pjesëtarit të UÇK-së, Salih Mustafa vazhdon edhe sot në Hagë
Në Hagë do të vazhdojë gjykimi ndaj ish-pjesëtarit të Ushtrisë Çlirimtare të Kosovës, Salih Mustafa, i njohur me nofkën Cali.
Të hënën Zyra e Prokurorit të Specializuar ka përfunduar pyetjet për dëshmitarin e tretë kundër Mustafës dhe sot dëshmitari do t’u përgjigjet pyetjeve të mbrojtjes së viktimave dhe avokatit të Salih Mustafës.
Të hënën dëshmitari i tretë i Zyrës së Prokurorit të Specializuar, ka thënë se në kohën kur i ishte bashkuar Ushtrisë Çlirimtare të Kosovës (UÇK), është marrë nga disa persona dhe është dërguar në një objekt në fshatin Zllashë, që sipas tij, aty është keqtrajtuar nga një persin që ai e quan komandant Cali.
Ai gjatë dëshmisë së tij, duke iu mbrojtur identiteti ka deklaruar se fillimisht nuk e ka ditur kush është personi e pastaj ka dëgjuar të tjerët duke iu drejtuar “Komandant Cali”. Por i njëjti në një dëshmi të dhënë prokurorit të ZPS-së më 2019 kishte thënë se personi ishte prezantuar vet si komandat Cali.
Gjatë dëshmisë së tij ai ka thënë edhe se në Zllashë është mbajtur 18 ditë, ku sipas tij është rrahur e maltretuar vazhdimisht.
Ai derisa i është përgjigjur prokurores Silvia D’Ascoli, ka thënë se si pasojë e maltretimit që pretendon se i është bërë në Zllashë, sot ka lëndime në krah, kokë dhe shikimin në syrin e majtë e ka të humbur.
Dëshmitarët e ZPS-së kanë filluar të dëshmojnë në këtë rast nga data 20 shtator, ku deri tani janë dëgjuar dy prej tyre.
Gjykimi filloi më 15 shtator 2021 me deklaratat hyrëse të Prokurorit të Specializuar dhe të përfaqësueses së viktimave.
Ky është gjykimi i parë që ka filluar në Dhomat e Specializuara të Kosovës në Hagë, e që Salih Mustafa është edhe i arrestuari i parë nga Specialja.
Në deklarimin e tij para trupit gjykues, Salih Mustafa është deklaruar i pafajshëm.
Aktakuza ndaj Mustafës është konfirmuar më 12 qershor 2020, ndërsa ai u arrestua më 24 shtator të vitit të kaluar, me pretendimin për krime lufte dhe kundër njerëzimit, dhe u dërgua në objektin e paraburgimit në Hagë.
Seanca e paraqitjes së parë së Mustafës u mbajt më 28 shtator 2020 para gjykatësit të procedurës paraprake, Nikola Giju. Në paraqitjen e tij të mëtejshme, më 28 tetor 2020, Mustafa u deklarua i pafajshëm për të gjitha pikat e aktakuzës.
Palët i dorëzuan si konfidenciale versionet e tyre të fundit të dosjeve paraprake, më 22 shkurt 2021 Zyra e Prokurorit të Specializuar dhe më 6 maj 2021 mbrojtja.
Më 30 prill 2021, gjykatësi i procedurës paraprake miratoi kërkesat e pesë viktimave dhe i pranoi ato si viktima pjesëmarrëse në procesin gjyqësor, Grupi I. Më 7 maj 2021, gjykatësi i procedurës paraprake ia kaloi dosjen e çështjes trupit gjykues I.
Më 21 maj 2021, trupi gjykues miratoi kërkesat e katër viktimave tjera dhe i pranoi ato si viktima pjesëmarrëse në procedura si pjesë e Grupit 1. Trupi gjykues gjithashtu zgjati afatin për viktimat për të aplikuar deri në mbylljen e çështjes së Prokurorit të Specializuar.
Konferencat përgatitore për gjykimin në këtë çështje u mbajtën më 9 dhe 10 qershor 2021.