Komunat ku ka nisur rinumërimi i votave, nga KQZ tregojnë detaje

Aktuale

Komunat ku ka nisur rinumërimi i votave, nga KQZ tregojnë detaje

Më: 21 tetor 2021 Në ora: 17:40
Pamje nga votimet, 17 tetor 2021

(E plotësuar 18:20) - Në Qendrën e Numërimit të Votave ka filluar procesi i rinumërimit të tetë vendvotimeve për kryetar komune, si dhe 15 tjerë për Kuvende Komunale.

Vendvotimet të cilat kanë shkuar në rinumërim me emrat e kandidatëve për kryetar komunash janë nga Kaçaniku, Klina, Mitrovica e Jugut, Podujeva, Prizreni, Skenderaj si dhe Prishtina.

Ndërsa ato me emrat e kandidatëve për Kuvendin Komunal janë nga Mitrovica e Jugut, Ferizaj, Novëbërda dhe Podujeva nga një, Prishtina dhe Prizreni nga katër, si dhe Skenderaj me tre vendvotime në rinumërim.

“Arsyet për rinumrëim janë se në disa vendvotime formularët e rezultateve kanë qenë të paplotësuar ose të plotësuara pjesërisht dhe ka pas raste kur kanë munguar nënshkrimet e anëtarëve të këshillave të vendvotimit, andaj duhet bërë rinumërimi me qëllim të saktësimit të gjendjes brenda kutive të votimit”, tha zëdhënësi i KQZ-së, Valmir Elezi.

“Puna po bëhet në 20 tavolina të numërimit, besojmë që brenda pak orëve do të përmbyllet”, shtoi ai.

***

Në Qendrën e Numërimit dhe Rezultateve ka nisur rinumërimi i 23 vendvotimeve nga komuna të ndryshme të Kosovës.

Sipas vendimit të KQZ-së, 8 vendvotime që do të rinumërohen u takojnë Zgjedhjeve për Kryetarë të Komunave dhe u takojnë këtyre komunave: Kaçanik (1 vendvotim), Klinë (1), Mitrovicë e Jugut (1), Podujevë (1), Prishtinë (2), Prizren (1) dhe Skenderaj (1).

Po sipas vendimit të KQZ-së, 15 vendvotimet tjera që do të rinumërohen u takojnë Zgjedhjeve për Kuvende Komunale dhe u takojnë këtyre komunave: Mitrovicë e Jugut (1 vendvotim), Novobërdë (1), Podujevë (1), Prishtinë (4), Prizren (4), Skenderaj (3) dhe Ferizaj (1).

Komisioni Qendror i Zgjedhjeve ka marrë vendim për të rinumëruar këto 23 vendvotime, pas rekomandimit nga Qendra e Numërimit dhe Rezultateve, e cila ka vërejtur se gjatë pranimit të materialit zgjedhor këto vendvotime nuk kanë mundur të pranohen si të rregullta.

Në disa prej këtyre vendvotimeve formularët e rezultateve kanë qenë të paplotësuara ose pjesërisht të plotësuara dhe në disa raste mungojnë nënshkrimet e anëtarëve të këshillit të vendvotimit, prandaj duhet të bëhet rinumërimi në mënyrë që të saktësohet gjendja brenda kutive të votimit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat