Masat e reja antiCOVID, vjen reagimi nga Shoqata e Gastronomëve

Aktuale

Masat e reja antiCOVID, vjen reagimi nga Shoqata e Gastronomëve

Më: 22 tetor 2021 Në ora: 17:10
Ilustrim

Gjatë ditës së sotme është mbajtur një takim mes ushtrueses së detyrës së ministrit të Shëndetësisë, Dafina Gexha-Bunjaku dhe përfaqësuesve të Asociacionit të Komunave të Kosovës, ku është diskutuar rreth masave antiCOVID.

Pas këtij takimi, kryetari i Asociacionit të Komunave të Kosovës, Sazan Ibrahimi, ka thënë se orari i gastronomisë do të ndryshojë, kurse ora policore pritet të fillojë nga ora 24:00-05:00.

“Sektori i gastronomisë është diskutuar të punojë deri në ora 23:00, kurse orë policore do të ketë nga ora 24:00-05:00. Mbajtja e maskës mbetet ende në fuqi”, tha ai.

Lidhur me këtë, sekretari i Shoqatës së Gastronomëve të Kosovës, Arian Vranica, tha se nuk janë plotësuar 100% kërkesat e tyre nga Ministria e Shëndetësisë rreth masave kundër COVID-19.

“Propozimet tona kanë qenë që të funksionojmë në bazë të rregullores komunale dhe të bëhet ngritja e kapaciteteve brenda lokaleve të gastronomisë si dhe heqja e orës policore. Ka ngritje të orarit të gastronomisë por jo në pajtueshmërinë e rregullores komunale. Është lajm i mirë duke pasur parasysh dëmet që po shkaktohen në Gastronomi gjatë kësaj periudhe kohore”, shtoi ai.

Tutje, Vranica tha se nuk pajtohen plotësisht me masat e reja kundër COVID-19, por sipas tij, është përçuar mesazhi për lirimin e këtyre masave nga Ministria e Shëndetësisë.

“Nuk është se pajtohemi 100% me masat e reja, por përderisa ka pasur veprim nga MSh-ja, konsideroj se nuk do të ketë lëvizje nga ne sepse është përçuar mesazhi që ka për qëllim lirimin e masave”, deklaroi Vranica.

Sot në Kosovë janë konfirmuar 16 raste të reja me koronavirus.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat