"Pas publikimit të dosjeve dëshmitarëve u dhamë telefona dhe disa i zhvendosëm nga Kosova"

Aktuale

"Pas publikimit të dosjeve dëshmitarëve u dhamë telefona dhe disa i zhvendosëm nga Kosova"

Më: 28 tetor 2021 Në ora: 14:13
Miro Jukiq

Miro Jukiq, Udhëheqës i Ekipit për Sigurimin dhe Trajtimin e Dëshmitarëve në Zyrën e Prokurorit të Specializuar në Hagë ka nisur të japë dëshminë e tij në rastin e ish drejtuesve të OVL-së së UÇK-së, Hysni Gucati dhe Nasim Haradinaj.

Jukiq ka folur për ngjarjet dhe aktivitetin e tyre pas rrjedhjes së dokumenteve të korrespondencave dhe dëshmive të Dhomave të Specializuara.

Ai ka thënë se shumica e dëshmitarëve kanë qenë të shqetësuar kur kanë kuptuar rrjedhjen e këtyre dokumenteve.

“Të gjithë ishin shumë të shqetësuar disa bërtisnin në telefon, disa na thonin që të mos i kontaktonim më. Reagimi i tyre në përgjithësi nuk ishte i mirë. Kur i kontaktonim prezantoheshim se kush ishim dhe pyesnim nëse kishin dyshuar për rrjedhjen e informacioneve dhe dokumenteve të ZPS”, është shprehur Jukiq.

“Njëri na tha që ka besim në ne dhe si mundet që emri i tij të ketë dalë në publik dhe që familja e tij ishte e rrezikuar”.

Si rrjedhojë ky zyrtar i DHSK-së ka thënë se ka pasur raste kur edhe i kanë zhvendosur dëshmitarët nga Kosova.

“Ne u dhamë numra të ri të telefonit, u blemë telefona dhe përgatitëm plane për menaxhimin e riskut. Disa edhe i zhvendosëm nga Kosova”.

Jukiq ka thënë se kanë kontaktuar me rreth 200 dëshmitarë pas rrjedhjes së dosjeve.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat