“Çka janë këto deklarata të opozitës?”, tensione në Komisionin për Integrim Evropian, Deliu-Kodra largohet e nervozuar nga mbledhja

Aktuale

“Çka janë këto deklarata të opozitës?”, tensione në Komisionin për Integrim Evropian, Deliu-Kodra largohet e nervozuar nga mbledhja

Më: 12 nëntor 2021 Në ora: 10:15
Komisioni për Integrim Evropian

(E plotësuar 11:09) - Deliun e nervozon përgjigjja e Bislimit, lëshon mbledhjen e Komisionit

Deputetja e PDK-së, Blerta Deliu-Kodra, e ka lëshuar mbledhjen e Komisionit për Integrim Evropian, duke bërë që mbledhja të përfundojë në mungesë të kuorumit.

Ajo i është drejtuar zëvendëskryeministrit, Besnik Bislimi me akuza ndaj qeverisë për shkarkime bordesh dhe emërime familjare, për çka ky i fundit iu përgjigj duke thënë se “nuk është bërë politizimi në mënyrë ekzogjene, d.m.th nga struktura jashtë institucionit, por është bërë nga institucionet brenda dhe nga subjektet që e kanë drejtuar”.

“Mendoj që është mirë që ju po ia jepni kësaj qeverie kompetencën për t’i korrigjuar këto gabime që janë bërë në të kaluarën”, i tha Bislimi.

Kjo përgjigje duket se e nervozoi deputeten Deliu-Kodra, e cila u ngrit nga tavolina duke e lëshuar mbledhjen duke thënë: “nuk keni asnjë argument për politizimin që jeni duke e vazhduar ju zotëri zëvendëskryeministër”.

Depolitizimi-depolitizimi, çka janë këto deklarata të opozitës?, pyet Bislimi në Komision

Gjatë raportimit të zëvendëskryeministrit të parë për Integrim Evropian, Zhvillim dhe Dialog, Besnik Bislimi në Komisionin për Integrime Evropiane, deputetja e Kuvendit nga PDK-ja, Blerta Deliu-Kodra ka thënë se krejt çka është parë në qeverisjen Kurti në këta shtatë muaj, politizimi në punësime, me dajë, halla dhe teze.

Ndaj kësaj deklarate ka reaguar deputeti nga VV, Driton Hyseni, i cili ka kërkuar që në këtë mbledhje fokusi të jetë vetëm për raportin e Progresit.

Në shenjë pakënaqësie deputetja, Blerta Deliu Kodra ka lëshuar mbledhjen, pasi zëvendëskryeministri Bislimi në përgjigjen e tij, u shpreh i habitur se çka janë këto deklarata të opozitës depolitizimi-depolitizimi.

Për shkak të kuorumit, është ndërprerë mbledhja dhe nuk u fut në votim raporti.

Bislimi: Në raportin e KE-së për Kosovën është vlerësuar puna e Qeverisë për marrëveshjen për targat

Zëvendëskryeministri i parë për Integrim Evropian, Zhvillim dhe Dialog Besnik Bislimi gjatë raportimit në Komisionin për Integrime Evropiane bëri të ditur se takimi i radhës në Bruksel ndërmjet kryenegociatorëve, në kuadër të dialogut ndërmjet Kosovës e Serbisë do të mbahet më 16 nëntor, të martën e ardhshme.

Derisa Bislimi theksoi se në raportin e Komisionit Evropian për Kosovën, është vlerësuar puna e Qeverisë, siç është marrëveshja për targat.

Më 30 shtator të këtij viti (2021) në Bruksel me ndërmjetësim të Bashkimit Evropian është arritur marrëveshja për targat mes Kosovës dhe Serbisë. Kjo pasi që 11 ditë më parë Qeveria e Kosovës kishte vendosur masën e reciprocitetit për targat e automjeteve që vijnë nga Serbia. Për të cilën masë reaguan nga Serbia, madje ishin bllokuar pika kufitare në Jarinje dhe Bërnjak.

Në marrëveshjen e arritur në Bruksel ishin tri pika. E para ishte që “Njësitet speciale policore të vendosura në pikë kalimet e përbashkëta kufitare në Jarinjë dhe Bërnjak, do të largohen bashkë me barrikadat, duke nisur nga 2 tetori, ora 08:00 deri në orën 16:00 të asaj dite. Misioni i NATO-s në Kosovë, KFOR, do të angazhohet në këto dy pika në Jarinjë dhe Bërnjak, para nisjes së tërheqjes të zyrtarëve policorë dhe barrikadave, dhe do të mbetet aty për dy javë për të garantuar sigurinë”, ndërsa e dyta ishte thënë që “Nga 4 tetori, do të nisë së zbatuari përkohësisht regjimi i letrave ngjitëse, në vend të heqjes së targave të makinave të regjistruara në Kosovë dhe Serbi, deri në gjetjen e një zgjidhjeje të përhershme”, si dhe pika e tretë ishte që “Më 21 tetor do të nisë punën një ekip i përbërë nga zyrtarë të Bashkimit Evropian, Prishtinës dhe Beogradit për të gjetur një zgjidhje të përhershme. Brenda gjashtë muajve, prej nisjes së takimit të parë, i ashtuquajturi Grup Punues, do të prezantojë gjetjet për një zgjidhje të përhershme në formatin e dialogut të nivelit të lartë”.

Ndërkohë që të enjten, media raportoi se raundi i ri i bisedimeve në nivel kryenegociatorësh do të mbahet të martën më 16 nëntor.

Zëdhënësi i Qeverisë, Përparim Kryeziu tha se temë e diskutimit do të jetë çështja e të zhdukurve me dhunë gjatë luftës, energjisë dhe lëvizja e lirë.

“Zëvendëskryeministri i Republikës së Kosovës për Integrim Evropian, Zhvillim dhe Dialog, Besnik Bislimi, do të marrë pjesë në takimin e paraparë për datën 16 nëntor 2021 në Bruksel në nivel kryenegociatorësh. Temat e diskutimit në takimin bilateral do të jenë çështja e të zhdukurve me dhunë gjatë luftës, e energjisë dhe lëvizja e lirë”, tregoi Kryeziu.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat