Ministri i Infrastrukturës, Liburn Aliu tha se në vizitën e fundit në Beograd ka treguar se do të ndërtohet hekurudha Durrës – Prishtinë. Pa u ndërtuar këtë hekurudhë, Aliu tha se nuk do të ketë asnjë lloj lidhjeje me Serbinë.
Këto komente Aliu i bëri duke iu përgjigjur pyetjes së deputetes së AAK-së, Time Kadrijaj, e cila e pyeti se “çfarë obligimesh keni marrë në Beograd?”.
“Të gjitha këto që po i thoni janë konkluza të juaja dhe mund të deklaroni çfarë të doni. Në Beograd ua kam bërë të qartë që do ta ndërtojmë hekurudhën Durrës – Prishtinë. Dhe pa e bërë hekurudhën Durrës – Prishtinë, nuk ka asnjë lloj lidhje tjetër me Serbinë. Edhe me Malin e Zi e kemi diskutuar shumë qartë hekurudhën Deçan – Plavë. Këtë ua kam sqaruar edhe në Beograd”, tha Aliu.
Ai shtoi se “kjo ka qenë detyrë e imja dhe e kam kryer detyrën time”.
Ai tregoi edhe planet e tjera për linjat hekurudhore.
“Prishtinë – Pejë, hekurudha që është aktuale do të modernizohet dhe e kemi futur në buxhetin e vitit që vie. Hekurudhën Klinë – Prizren do ta funksionalizojmë fillimisht, e më pas mbase do të vie puna te modernizimi. Kjo hekurudhë ka me qenë urëlidhëse mes portit të Durrësit dhe Prishtinës”, tha Aliu.
Kjo, sipas tij, do të mundësojë transportin e mallrave, proces i cili, siç tha Aliu, “mund ta shndërrojë Prishtinën në një vend nga ku mund të shpërndahen këto mallra”.
