Jo më vota për të dyshuarit e speciales pa u larë në gjykatë apo në burg!

Si është e mundur që të ketë rezultat zgjedhor kaq impresiv Aleanca për Ardhmërinë e Kosovës, i fiton pesë komuna, pa qenë në pushtet qendror.

Si është e mundur që për aq shumë dyshime, madje kriminale në vend të një fundi politik, shqiptarët t’ia rezervojnë edhe disa fitore lokale, në pesë qytete.

Është e vërtetë që në zgjedhje lokale, njerëzit i shohin figurat vendore, por ama a nuk meritojnë ndëshkim liderët, edhe në lokalitete.

Këto fitore u kanë dhënë shansin të qëndrojnë në këmbë në politikë vëllezërve Haradinaj.

Çështja nuk është kaq e thjeshtë. Votë - numërim – pushtet.

Çështja është se si të spastrohet skena e krimit, e bartur në politikë. Si të gjenden mekanizma, që ata të nxirren nga aty.

Janë vetëm dy mekanizma të sigurtë, ndëshkimi me votë, që është më demokratik dhe më human, dhe mënyra e dytë me largim nëpërmjet gjykimit, ashtu siç ndodhi me Thaçin, Veselin, Krasniqin, Selimin.

Thaçin e Veselin, nuk kishte kush t’i largonte, po të mos ishte specialja. Ata sot do të gjendeshin në pozitat më të larta shtetërore.

Ramush Haradinaj, i dyshuar nga gjykata speciale, i pasuruar pa fund, dhe i shndërruar në objekt tallje e humori, për blerjen e ish pronave shoqërore me çmime qesharake (2-3 euro për një ari), fiton sërish, madje më shumë se fituesi i zgjedhjeve të fundit nacionale. E mund 5 me 4, madje duke e fituar një qytet më të rëndësishëm se VV-ja, Gjakovën, një nga shtatë qendrat e organizimit rajonal të Kosovës.

Një humbje e rëndë për fituesit, e edhe më e rëndë për liderin e saj. Kjo i bie si një lloj humbje e drejtpërdrejt e Albinit nga Ramushi. Kjo edhe ndodhi në Gjakovë, duke e mundur me rezultat bindës, edhe pse atje garonte ish kryetarja e qytetit, Mimoza Kusari – Lila.

Unë e kuptoj, që humbjet kanë ndodhur për shkak të vlerësimeve të gabuara nga zgjedhësit lokal, për shkak të humbjes së referencave qytetare në këto 15 vitet e fundit sidomos, ku mashtruesit, zhvatësit, të inkriminuarit, vjedhësit e buxhetit të shtetit, janë bërë model sjelljeje në këtë vend.

Ama nuk mund ta kuptojë, që njerëzit e akuzuar për krime, vrasje politike dhe me motive të tjera, të vazhdojnë të shpërblehen. Nuk ka shpërblim më të mirë dhe më të madh për ta, se sa dhënia e fitoreve, qoftë edhe lokale. Ata para kanë mjaft, pasuri të patundshme, dhe jetë luksoze, por pa këto fitore, nuk do ta kishin asnjë ndikim, pra thuaja do të ishin pranë zeros, për shkak të devalvimit të tyre të jashtëzakonshëm moral.

Si nuk ju mjaftuan akuzat për vrasje të pasluftës, si nuk ju mjaftuan akuzat e bëra nga dëshmitarë të vrasjeve dhe madje pjesëmarrës, si nga Shkumbin Mehmeti, që mbahet në burg si anëtar i skuadrës së vrasjeve, që dëshmonte me deklaratë me shkrim se: “Qerim Kelmendi dhe Ramush Haradinaj janë marrë vesh të kryejnë vrasje në Dukagjin!”

Pse ju duhet të prisni t’i vërtetojë drejtësia. Jo, ai do të duhej ta priste drejtësinë për ta pastruar veten, nëse vërtetë është i pafajshëm. Në këto raste ka përparësi dyshimi negativ, dhe jo pozitiv, se mbase ai është i pafajshëm.

Jo, ai do të jetë i fajshëm derisa të lahet para drejtësisë, dhe as ai, as vëllai i tij, por as mbështetësit e tij në parti dhe të partive të tjera, nuk mund dhe nuk duhet të marrin vota, pa u larë në gjykatë apo në burg!