Bajrami: Nuk mbaj përgjegjësi për vjedhjen në Thesar

Aktuale

Bajrami: Nuk mbaj përgjegjësi për vjedhjen në Thesar

Më: 1 dhjetor 2021 Në ora: 00:07
Hykmete Bajrami

Ish-ministrja e Financave Hykmete Bajrami ka folur për rastin e vjedhjes së më shumë se dy milionë eurove nga Thesari i Shtetit në tetor të vitit të kaluar.

Ajo ka thënë se vjedhja e Thesarit nuk është pika e saj e dobët, pasi ajo i ka marrë të gjitha masat.

“E vetmja përgjegjësi ka qenë që kam qenë ministre në kohën kur ka ndodhur ky skandal. Të gjithë duhet ta dinë, se Thesari nuk është pika e dobët e Hykmete Bajramit. Ka qenë fatkeqësi, nuk ka qenë përgjegjësi e imja. Nuk mbaj përgjegjësi për atë që ka ndodhur, i kam marrë të gjitha masat”, tha Bajrami.

Policia e Kosovës e ka evidentuar rastin në fjalë më 9 tetor 2020, ndërsa deri më 20 tetor kur u krye arrestimi i parë kanë qenë duke zhvilluar hetimet.

Prokuroria Speciale e Kosovës ka ngritur aktakuzë në Gjykatën Themelore në Prishtinë ndaj dy personave nën dyshimet se kanë kryer vjedhjen e parave nga Thesari.

Labinot Gruda dhe Kadri Shala akuzohen për disa vepra penale. Gruda akuzohet për “keqpërdorim të detyrës”, “hyrje në sistem kompjuterike”, “vjedhje identiteti dhe pajisja e qasjes” dhe “shpëlarje parash”. Ndërkaq Shala për “shpëlarje parash”, “ndihmë” në ndërlidhje me “keqpërdorim detyre”.

Dyshimet e para ishin se vjedhja qe kryer përmes sistemit elektronik. Ishin bërë katër pagesa në emër të tri projekteve rrugore.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat