Kryeministri Kurti: Po përgatitemi për vendime tjera të mira

Aktuale

Kryeministri Kurti: Po përgatitemi për vendime tjera të mira

Nga: M.L. Më: 1 dhjetor 2021 Në ora: 09:33
Kryeministri Albin Kurti

Kryeministri i Kosovës, Albin Kurti përmes një postimi në Facebook tha se mbrëmë në mbledhjen e 46 të Qeverisë së Kosovës, u morën disa vendime mjaft të rëndësishme.

Ai me këtë rast përmendi masat e reja kundër COVID-19, promovim dhe respektim i diversitetit e barazisë, katër projektligje të miratuara dhe dy vendime të mëhershme të shfuqizuara.

“Mbledhjen e mbrëmshme të Qeverisë, të 46-tën, e zhvilluam në mënyrë elektronike. Si vendim të parë, miratuam masat e reja për kontrollin, parandalimin dhe luftimin e pandemisë COVID-19. Ato i përgjigjen situatës së tanishme pandemike në vend por edhe nevojës për të qenë të kujdesshëm ndaj virusit i cili me disa variante të tij vazhdon të jetë prezent në mesin tonë”, u shpreh kryeministri.

Ai tregoi se viti 2022 u shpall, vit i personave me aftësi të kufizuara në Republikën e Kosovës.

“Së bashku do të punojmë për një shoqëri me gjithë-përfshirje e mundësi për të gjithë. Ndër 14 vendimet e kësaj mbledhje nga 408 sa kemi marrë gjithsej që nga fillimi i qeverisjes sonë, katër ishin për miratimin e projektligjeve nga fushëveprimi i Ministrisë së Mbrojtjes, tek ai i Ministrisë së Financave, Punës dhe Transfereve e deri te i Ministrisë së Arsimit, Shkencës, Teknologjisë dhe Inovacionit”, potencoi kryeministri.

Po ashtu, ai njoftoi edhe për shfuqizimin e dy vendimeve të qeverive të mëhershme.

Shtuam ligjshmëri duke shfuqizuar edhe dy vendime të qeverive të mëparshme. Njëri i qershorit të vitit 2018 për emërimin e zëvendësdrejtorit për shërbime administrative-financiare në Agjencinë e Shërbimit të Navigacionit Ajror. Tjetri i qershorit të vitit 2019 për rekomandimin e ministrit të atëhershëm të Mbrojtjes në lidhje me ristrukturimin e disa pozitave në këtë ministri.

Vazhdojmë punën si dhe përgatitjet për vendime tjera të mira…”, përfundoi kryeministri.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat