Demush Shasha tregon cilat janë dy lajmet nga mbledhja e djeshme në Bruksel, ja çfarë konfirmoi Kurti

Aktuale

Demush Shasha tregon cilat janë dy lajmet nga mbledhja e djeshme në Bruksel, ja çfarë konfirmoi Kurti

Nga: G.B Më: 8 dhjetor 2021 Në ora: 13:32
Demush Shasha

Demush Shasha nga Instituti EPIK ka reaguar për mbledhjen e djeshme të Këshillit Stabilizim Asocimi.

Përmes një postimi në Facebook, ai ka thënë se janë dy lajme nga kjo mbledhje, e para që kryeministri Kurti konfirmoi se Kosova do të aplikojë vitin tjetër për anëtarësim në BE – akti i cili shpie drejt marrjes së statusit të vendit kandidat, përcjell Bota sot.

Ndërsa, lajmi i dytë sipas tij është hendeku në mes Kosovës dhe BE-së për çështjen e Asociacionit tani më është edhe publik.

Postimi i tij i plotë:

Janë dy lajme nga mbledhja e djeshme e Këshillit Stabilizim Asocimi:

1. Kryeministri Kurti konfirmoi se Kosova do të aplikojë vitin tjetër për anëtarësim në BE – akti i cili shpie drejt marrjes së statusit të vendit kandidat. Statusi i vendit kandidat është njohje e rëndësishme politike dhe ekonomike për vendin. Është një lloj i avancimit nga liga e dytë të vendeve të Ballkanit, në ligën e parë. Kosova dhe Bosnja mbesin të vetmet vendet në rajon pa statusin e vendit kandidat. Sa do jetë i suksesshëm aplikimi i Kosovës mbetet të shihet. Bosnja ka aplikuar për anëtarësim në vitin 2016 dhe përkundër pranimit të aplikacionit nga ana e BE-së, Bosnja ende, pesë vite më vonë, nuk ka arritur të përmbush kriteret e nevojshme për marrjen e statusit të vendit kandidat. Sidoqoftë, tentativa e Qeverisë për të dalë nga status-quoja në procesin e integrimit është e mirëseardhur.

2. Hendeku në mes Kosovës dhe BE-së për çështjen e Asociacionit tani më është edhe publik. Përfaqësuesi i Lartë Borrell publikisht shprehi mospajtim me Kryeministrin Kurti sa i përket obligimit të Kosovës për ngritjen e Asociacionit. Në të njëjtën vij me BE-në është edhe SHBA. Pra, deri në, dhe me përfundimin e zgjedhjeve në Serbi në prill 2022, presioni ndërkombëtar mbi Kryeministrin Kurti do të rritet për të marr vendime të vështira në kuadër të dialogut. Është e qartë se i vije fundi atij narracioni “dialogu është prioritet i katërt”, “duhet të bëhet dialog me Serbët lokal”, “CEFTA duhet të zëvendësohet me SEFTA”, etj. Tani më është e qartë se asnjë nga këto qëndrimet nuk kanë mbështetjen e BE-së apo SHBA-ve. Siç duket Kryeministri Kurti është në udhëkryq. Me një anë ai mund të zgjedh rrugën e lehtë dhe të bëhet “i favorizuari i ndërkombëtarëve”, duke thënë PO kërkesave të tyre. Apo ai mund të zgjedh rrugën e vështirë dhe të qëndroj besnik bindjeve të tij dhe aleancës që ka bërë me qytetarët.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat