(E plotësuar 19:01) - Gjykata Speciale ka dhënë detaje lidhur me vizitën e ish-kreut të UÇK-së, Kadri Veseli, në Kosovë.
Veseli është kthyer në vendlindje pasi disa ditë më parë i vdiq nëna në moshën 93 vjeçare.
“Për shkak të arsyeve detyruese humanitare, gjyqtari i procedurës paraprake udhëzoi Sekretarin që të menaxhojë një vizitë nën mbikëqyrje në Kosovë për z. Veseli për të takuar familjen. I akuzuari mbetet në paraburgim dhe në mbajtje nga Dhomat e Specializuara. EULEX-i dhe Policia e Kosovës po mbështesin Dhomat e Specializuara të Kosovës”, kanë thënë nga Dhomat e Specializuara.
Nga Specialja nuk është dhënë detaje se për sa kohë do të qëndrojë Veseli në Kosovë.
“Për arsye operacionale dhe për të respektuar privatësinë e z. Veseli, nuk mund të japim asnjë informacion shtesë për vizitën e kujdestarisë në Kosovë”, ka thënë zëdhënësi Michael Doyle.
Veseli ka ardhur në vendlindjen e tij ku sot ka shkuar për të vizituar varrin e nënës, varrimi i së cilës u bë dje.
Para disa muajve Veseli ishte lejuar të vinte në Kosovë nga Haga edhe një herë pasi kishte ndërruar jetë babai i tij.
**********
Ish-kryetari i Kuvendit të Kosovës Kadri Veseli, i ka vizituar varrezat e fshatit Broboniq të Mitrovicës ku është varrosur nëna e tij.
Veselit për këtë shkak edhe i është lejuar nga Gjykata Speciale vizita në familjen e tij në Kosovë.
Ai fillimisht mbërriti në shtëpinë e tij në Mitrovicë, ku para derës së shtëpisë po e priste bashkëshortja dhe fëmijët.
Nëna e Veselit vdiq të premten.
***
Ish-kryeparlamentari i Kosovës, Kadri Veseli, ka arritur rreth orës 14:00 në shtëpinë e prindërve të tij në Mitrovicë.
Ai po shoqërohet nga forca të EULEXI-t, ndërsa askush nuk po lejohet të afrohet 50 metra afër shtëpisë së tij.
Mësohet se më parë Veseli ka vizituar varrezat në fshatin Broboniq e pastaj ka mbërritur në Mitrovicë.
Vizita e Veselit vjen pas vdekjes së të ëmës e cila ndërroi jetë të premten.
***
Ish-kryetari i Kuvendit të Kosovës, Kadri Veseli, ka arritur në shtëpinë e tij në Mitrovicë.
Para shtëpisë janë parë bashkëshortja e Veselit, Violeta Veseli dhe fëmijët.
Ardhja e Veselit në Kosovë po përcillet me masa të rrepta sigurie.
Dhomat e Specializuara të Hagës ia kanë lejuar Veselit vizitën në Kosovë pasi të premten e javës së kaluar, atij i vdiq nëna, Ajshe Veseli.
Eskorta e Kadri Veselit rrugës për Mitrovicë
Makina të EULEX-it dhe të Policisë së Kosovës janë parë duke shkuar në drejtim të Mitrovicës.
Në pamjet e siguruara nga media eskorta në të cilën besohet se është ish kryetari i kuvendit, Kadri Veseli u pa në fshatin Smrekonicë.
Kujtojmë se ditë më parë, Veselit i ka vdekur nëna, e që kjo është edhe arsyeja e ardhjes së tij në Kosovë nga qendra e paraburgimit në Hagë.
***
Ka arritur në Kosovë ish kryetari i Kuvendit të Kosovës dhe ish kryetar i PDK-së, Kadri Veseli.
Veseli është liruar përkohësisht nga Haga dhe ka arritur në Kosovë, ku fillimisht ka shkuar drejt tek varrezat në fshatin e tij në Broboniq për të vizituar varrin e nënës e cila ndërroi jetë para dy ditësh.
Sipas burimeve, Veseli nga varrezat do të lejohet të vizitojë edhe familjarët e tij në Bair të Mitrovicës.
Veseli gjithë kohën është i shoqëruar nga disa vetura të EULEX-it.
Ajshe Veseli ndërroi jetë në moshën 93 vjeçare.
