Publikohet dokumenti i ministrit rus: “Ka një plan për Shqipërinë e Madhe”

Aktuale

Publikohet dokumenti i ministrit rus: “Ka një plan për Shqipërinë e Madhe”

Më: 23 janar 2022 Në ora: 06:23
Sergei Lavrov

Rusia nis një sulm ndaj Perëndimit për shkak të "heshtjes" së saj ndaj synimit të Shqipërisë dhe Kosovës për të krijuar një "Shqipëri të Madhe" dhe e quan katastrofik çdo rishikim të fshehtë të kufijve në rajon

Rusia thotë se “ndan” plotësisht “shqetësimin” për "fanatizmin" e disave në Prishtinë dhe Tiranë dhe synimin e tyre për të krijuar të ashtuquajturën “Shqipëri e Madhe” përmes bashkimit të “dy shteteve shqiptare” në Ballkan, thuhet në një dokument të Ministrisë së Jashtme ruse.

Në dokumentin që mban autorësinë e ministrit prej shumë vitesh në krye të MPJ ruse, Lavrov, flitet me nota të ashpra kundër shqiptarëve në Shqipëri dhe trojet përtej kufirit, duke sugjeruar se ata kanë një plan konkret për bashkimin e territoreve të tyre dhe se ky plan po mbështetet nga BE, më së paku me heshtje.

"Subversive"

Këto “plane” mund të cilësohen vetëm si subversive. “Çdo rishikim i fshehtë i kufijve në rajon është përkufizim katastrofik për stabilitetin tashmë të brishtë në këtë pjesë të Evropës, ku mbetet shumë për të bërë për të kapërcyer efektet e konflikteve dhe luftërave të viteve 1990", thuhet në dokument, nga Ministri i Jashtëm rus Sergei Lavrov.

“Zgjidhja e qëndrueshme e problemit të Kosovës është e mundur vetëm në bazë të së drejtës ndërkombëtare, në veçanti Rezolutës 1244 të Këshillit të Sigurimit të OKB-së, e cila garanton, ndër të tjera, integritetin territorial të Serbisë me Krahinën Autonome të Kosovës".

"Në kuadër të këtij dokumenti të OKB, bisedimet Beograd-Prishtinë mund dhe duhet të zhvillohen”, vazhdon ministri i Jashtëm rus, duke shtuar se “rezultati i këtyre bisedimeve duhet të jetë një zgjidhje afatgjatë, e cila të kënaqë palën serbe dhe të marrë miratimin e saj".

Këshilli i Sigurimit i OKB-së

Diplomacia ruse pretendon se "ka ardhur koha që udhëheqja e Prishtinës të kuptojë se përpjekjet e saj provokuese për të bindur pjesën tjetër të botës për qëndrueshmërinë e "shtetit famëkeq të Kosovës" janë të destinuara të dështojnë që në fillim".

"Heshtja e Perëndimit"

“Nxitja e nacionalizmit dhe shovinizmit shqiptar, shtypja sistematike e popullatës serbe dhe pakicave të tjeta joshqiptare, si dhe persekutimi i Kishës Ortodokse Serbe dëshmojnë për qenësinë e këtij plani”, thuhet në dokumentin e Lavrov.

Për diplomacinë ruse, “heshtja e Perëndimit prej kohësh nuk është befasuese”, por është “simptomë e kënaqësisë së verbër të tekave të ekstremistëve shqiptaro-kosovarë nga mbrojtësit e tyre të huaj”.

Sipas vlerësimit rus, "BE-ja, së cilës i është besuar nga Asambleja e Përgjithshme e OKB-së një rol ndërmjetësues në dialogun Beograd-Prishtinë, është e qartë se nuk po i përgjigjet OKB-së, duke lënë të kuptohet se për Moskën zyrtare, BE duhet të mos jetë më e besuara e OKB për këto negociata".

“Ne do të vazhdojmë të kërkojmë që sulmet e Prishtinës të vlerësohen siç duhet nga organizatat ndërkombëtare, përfshirë Këshillin e Sigurimit të OKB-së, në interes të ruajtjes së paqes dhe sigurisë në Ballkan”, përfundon dokumenti i Lavrov./Noa

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat