Këto janë sanksionet që Kosova vendosi sot ndaj Rusisë dhe Bjellorusisë

Aktuale

Këto janë sanksionet që Kosova vendosi sot ndaj Rusisë dhe Bjellorusisë

Më: 16 maj 2022 Në ora: 19:31
Foto ilustrim

Qeveria e Kosovës ka zgjeruar listën e sanksioneve ndaj Rusisë si dhe Bjellorusisë, në mbledhjen e 78-të që është mbajtur të hënën.

Zyra e Kryeministrit të Kosovës ka njoftuar se janë ngrirë asetet në Kosovë të individëve apo entiteteve të sanksionuara, është ndaluar qasja e operimit në tregun financiar në Kosovë, si dhe u është ndaluar udhëtimi individëve të sanksionuar.

“Sipas vendimit sanksionet do të konsistojnë në: ngrirje të aseteve në Republikën e Kosovës të individëve apo entiteteve të sanksionuara, ndalimin e qasjes dhe operimit në tregun financiar në Kosovë individëve apo entiteteve të sanksionuara, ndalimin e udhëtimit në territorin e Republikës së Kosovës të individëve të sanksionuar, – ndalimin për individë dhe entitete të Republikës së Kosovës që të vënë në dispozicion fonde, qoftë në mënyrë direkte ose indirekte për individët dhe entitetet e sanksionuara; – ndalimin për çdo ndërmarrje transporti rrugor rus apo bjellorus që të transportojnë mallra në Republikën e Kosovës (përjashtimisht të produkteve farmaceutike, mjekësore, bujqësore dhe ushqimore për qëllime humanitare), ndalimin e importit nga Rusia të qymyrit dhe lëndëve tjera djegëse të ngurta fosile në Kosovë, nëse ato janë me origjinë nga Rusia ose eksportohen nga Rusia”, thuhet ndër tjerash në njoftim.

Sipas ZKM-së, Qeveria ka miratuar vendimin për vendosjen e masave kufizuese kundër grupit Ëagner i cili konsiderohet se është i ndërlidhur apo përgjegjës për veprime që “minojnë dhe kërcënojnë integritetin territorial, sovranitetin dhe pavarësinë e Ukrainës.

“Gjithashtu konsiderohet përgjegjës edhe për shkeljen dhe abuzimin e të drejtave të njeriut dhe për aktivitete destabilizuese edhe në vende tjera, duke përfshirë Libinë dhe Sirinë. Aktivitetet e këtij entiteti janë në kundërshtim me ligjin ndërkombëtar për të drejtat e njeriut. Sanksionet sipas këtij vendimi përfshijnë: ngrirje të aseteve në Republikën e Kosovës të individëve apo entiteteve të sanksionuara; ndalimin e udhëtimit në territorin e Republikës së Kosovës të individëve të sanksionuara; ndalimin për individë dhe entitete te Republikës së Kosovës që të vënë në dispozicion fonde, qoftë në mënyrë direkte ose indirekte për individët dhe entitetet e sanksionuara”, njofton tutje Qeveria.

Po ashtu, ndër vendimet e marra është edhe zbatimi i sanksioneve ndërkombëtare të vendosura nga Këshilli i Bashkimit Evropian për marrjen e masave restriktive anti-terroriste ndaj ISIL dhe Al-Qaeda si dhe personave fizikë dhe juridikë, subjekteve ose strukturave tjera të lidhura me këto organizata, që veprojnë në Afganistan dhe rajonin fqinjë.

“Këto sanksione do të jenë në fuqi deri në një vendim tjetër dhe varësisht nga rrethanat mund të përditësohen. Ajo përfshijnë: ngrirje të aseteve në Republikën e Kosovës të individëve apo entiteteve të sanksionuara; ndalimin e udhëtimit në territorin e Republikës së Kosovës të individëve të sanksionuar; ndalimin për individë dhe entitete të Republikës së Kosovës që të vënë në dispozicion fonde, qoftë në mënyrë direkte ose indirekte për individët dhe entitetet e sanksionuara”, thuhet ndër tjerash në njoftim.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat