Kosova dhe Shqipëria do të zgjerojnë bashkëpunimin në fushën e shëndetësisë edhe me dy marrëveshje të reja.
Kështu është bërë e ditur pas takimit të Ministres së Shëndetësisë dhe të Mbrojtjes Sociale të Shqipërisë, Ogerta Manastirliu e cila u prit nga Zëvendësministrat e shëndetësisë në vend Dafina Gexha e Arsim Berisha.
Marrëveshjet kanë të bëjnë me ofrimin e shërbimeve shëndetësore në zonat kufitare si në Prizren e Gjakovë dhe qasjen e lehtë të shërbimeve në sezonin turistike për qytetarët e të dyja vendeve.
Këto marrëveshje pritet të nënshkruhen në mbledhjen e dy qeverive.
Ndryshe ministrja Manastirliu ka vizituar ministrin Rifat Latifi në QKUK pasi i njëjti i është nënshtruar një intervenimi kirurgjik. Gjendja shëndetësore e Latifit konfirmohet se është përmirësuar dhe pritet që nesër të lirohet për në shtëpi.