Komunitetet jo shumicë i japin mbështetje vettingut

Aktuale

Komunitetet jo shumicë i japin mbështetje vettingut

Më: 2 korrik 2022 Në ora: 14:11
Foto nga takimi

Pas takimeve me përfaqësuesit e Partisë Demokratike të Kosovës dhe Aleancës për Ardhmërinë e Kosovës, kryeministri Albin Kurti, bashkë me ministren e Drejtësisë, Albulena Haxhiu kanë takuar përfaqësues të komuniteteve rom, ashkalinj, egjiptian dhe turk, për të diskutuar lidhur me procesin e vetingut në drejtësi.

Kurti thuhet se ka folur për hapat e mëtejmë lidhur me këtë proces dhe rëndësinë e koordinimit të përbashkët, pas opinionit të pranuar nga Komisioni i Venecias.

Sipas komunikatës së lëshuar nga qeveria, përfaqësuesit e subjekteve politike të komuniteteve jo shumicë, shprehën mbështetjen e tyre për procesin e vetingut dhe reformës në drejtësi.

Qeveria e Republikës së Kosovës ka miratuar Koncept Dokumentin për zhvillimin e procesit të Vetingut në Sistemin e Drejtësisë, si dhe ka përgatitur draftin e amendamenteve kushtetuese dhe projektligjin për vetingun në sistemin e drejtësisë. Më datë 17 qershor 2022, Komisioni i Venecias ka miratuar Opinionin për Vetingun.

Në takimin e sotëm me kryeministrin Kurti dhe ministren Haxhiu ishin të pranishëm partnerët e koalicionit, kryetarja e NDS, Emilija Rexhepi, kryetari i IRDK, Elbert Krasniqi, kryetari i KDPT, Fikrim Damka, kryetari i LPRK, Erxhan Galushi dhe kryetari i PAI, Etem Arifi.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat