Eduard Frrokaj një qytetar nga Gjakoba i është drejtuar me një letër kryeministrit të Kosovës, Albin Kurti, me titullin ‘Letër nga Meja, kryeministrit Kurti’.
Frrokaj përmes një shkrimi në Facebook i ka përmendur disa emra të njohur serb, të cilët në luftën e Kosovës, urdhëruan të vriteshin e masakroheshin shqiptarë, ndërsa sot ata dekorohen e mbajnë pozita të larta në Serbi.
Ai kërkoi nga kryeministri Kurti që të reagojë sa më shpejtë, pasi sipas tij, kriminelët e luftës duhet të jenë para gjykatës dhe jo në krye të shtetit fqinj, Serbisë, sic e përmend Bozhidar Deliç i cili dje është emëruar Nënkryetar i Parlamentit të Serbisë.
“Ju Kryeministër shpesh keni debatuar për aneminë tonë politike dhe publike prandaj tani është koha dhe ora juaj .Vepro dhe reago .Varret në Meje nuk flasin sepse Stojanoviç ,Lazareviç,Zhivanoviç dhe Deliç kanë urdhëruar vrasjen e 376 shqiptarëve në mesin e tyre 38 fëmijë . Në bazë të çerrifikatave të vdekjes post mortum 95 përqind e viktimave në Meje kanë plumba në kokë . Edhe fëmijët i vranë me plumba në kokë .Që të mos ketë të mbijetuar ,të vritet dëshmia. Kryeministër është detyrë institucionale dhe patriotike të reagoni dhe veproni ,është koha dhe ora juaj”, ka shkruar Frrokaj.
Postimi i plotë:
Letër nga Meja Kryeministrit Kurti
Kryeministër para një ore erdha nga Meja në drejtim të Gjakovës . Është krejtë rutinore kur kalon nëpër Meje e kthen kokën nga varrezat e masakrës brutale . Një krim i paparë dhe sipas raporteve ndërkombëtare njëri prej më të organizuarve në tërë hapësirën e ish Jugosllavisë ka ndodhur në këtë fshat të vogël të Gjakovës me 27 prill 1999 .
Derisa forcat serbe këtë mëngjes prilli po shkonin në drejtim të Mejes dhe po i rrethonin 15 fshatra të Gjakovës ishte dhënë edhe një urdhër të arrestohet dhe të burgoset Albin Kurti . Gjeneratën tonë Kryeministër të lindur me 1975 kishin filluar ta vrasin në fushë të Mejes dhe ta burgosin në Prishtinë .
Ditën që kryen vrasjen e 15 fshatrave të Gjakovës burgosen Albin Kurtin .Koinçidencë që shqiptarët ti vrasin fizikisht dhe intelektualisht .
Por Kryeministër sot je në krye të shtetit dhe vrasësit kanë emër . Viktimat të ardhura nga Batajnica kanë varre pafund sa të lodhen sytë .I ke parë edhe ti dhe je përkul para tyre .
Vrasësit e Mejes po dekorohen në Serbi . Njëri ndër ta Miomir Stojanoviç shef i sigurimit ushtarak në Korpus të Prishtinës sipas shumë raporteve ishte truri dhe prapavija e masakrës, kurrë nuk është hetuar seriozisht .Miomiri ka lindur në Gjakovë dhe flet gjuhën shqipe rrjedhshëm . Ai ka urdhëruar sipas dëshmive të Ushtrisë Jugosllave që të vriten 500 shqiptarë në Rekë dhe Luginë ,ka orkestruar njësitë dhe urdhërat gjatë operacionit “Reka ” me epiqendër masakrën brutale në Meje .
Stojanoviç ka qenë deputet në Parlamentin e Serbisë dhe këshilltar politik .
Vladimir Lazareviç Komandanti i Korpusit të Prishtinës pasi ka mbajtur 14 vite burg i dënuar nga Tribunali në Hagë po ligjëron në Akademinë Ushtarake Serbe për ” heronjët ” serb . Në bazë të dëshmive relevante nga Ushtria Jugosllave Lazareviç ka udhëhequr sulmin në Rekë dhe Luginë të Çarragojës që nënkupton grumbullimin dhe ekzekutimin në Meje të 376 shqiptarëve prej tyre 38 fëmijë .Sipas raporteve Lazareviç ka urdhëruar dhe kordinuar operacionin nga një lokacion në qendër të Gjakovës .
Lazareviç ka udhëhequr edhe operacionet luftarake në Koshare .
Dragan Zhivanoviç ishte zëvendëskomandant i operacioneve luftarake në Koshare vartës i Lazareviçit . Në një dokument ushtarak me 25 prill 1999 Zhivanoviç njofton shtabin në Beograd se ” kemi identifikuar ” 200 terroristë në rajonin e fshatrave Rracaj ,Pacaj ,Sheremetaj ,Dobrosh . Ata po sulmojnë dhe po fshehen në fshatra .Nuk do mend se ishte një raport i sajuar . Mbi 200 civilë vetëm nga rajoni i këtyre fshatrave u ekzekutuan në Meje me 27 prill 1999 .Zhivanoviç kurrë nuk u hetua seriozisht .
Bozhidar Deliç dje është emëruar Nënkryetar i Parlamentit të Serbisë .Deliç ka lindur në Lugbunar të Gjakovës me 1956 . Sipas një dëshmitari të Ushtrisë Jugosllave të nacionalitetit boshnjak Deliç në gusht të vitit 1998 urdhëroj vrasjen e familjeve Mërturi dhe Krasniqi në Meqe të Gjakovës . Nga këto dy familje u vranë 6 civilë .Ishte hakmarrje për vrasjen e një pjestari të familjes Deliç në vitet 80 .
Gjatë operacioneve në Meje dhe fshatrave përreth në bazë të hartave edhe të Ushtrisë Jugosllave brigada 549 e motorizuar e Ushtrisë Jugosllave ishte e vendosur në dy pika në Korenicë 2 kilometra nga Meja ,68 të vrarë nga 376 gjatë kasaphanes në Rekë u ekzekutuan në oborre të shtëpive në Korenicë .
Deliç në paraqitjet e shpeshta publike në Serbi ka mbrojtur krimet serbe dhe ka akuzuar disa herë Naton për agresion dhe se e ka sëmurë atë personalisht nga kanceri .
Bozhidar Deliç nga dje është nënkryetar Parlamenti ndërkohë fushat e Dukagjinit janë të mbushura varre nga urdhërat e tij . Kryeministër është detyrë e juaja të reagoni dhe të veproni që një kriminel lufte që ka vrarë edhe fëmijë të jetë para gjykatës dhe jo në krye të shtetit fqinj.
Në këtë operacion gjysmën e viktimave i vranë nga fshatrat Korenicë ,Guskë ,Dobrosh dhe Rracaj gjithsejt 180 .Në këto katër fshatra nuk lanë njeri të gjallë nga mosha 15 vjeçare .Të vrarët i përkisnin dy religjioneve katolik dhe mysliman.Kishin dy fe dhe vetëm një atdhe .
Ju Kryeministër shpesh keni debatuar për aneminë tonë politike dhe publike prandaj tani është koha dhe ora juaj .Vepro dhe reago .Varret në Meje nuk flasin sepse Stojanoviç ,Lazareviç,Zhivanoviç dhe Deliç kanë urdhëruar vrasjen e 376 shqiptarëve në mesin e tyre 38 fëmijë . Në bazë të çerrifikatave të vdekjes post mortum 95 përqind e viktimave në Meje kanë plumba në kokë . Edhe fëmijët i vranë me plumba në kokë .Që të mos ketë të mbijetuar ,të vritet dëshmia .
Kryeministër është detyrë institucionale dhe patriotike të reagoni dhe veproni ,është koha dhe ora juaj .
Meje 5 gusht 2022 .
P.S : Foto 1 Raporti i Fondit për të drejtën ndërkombëtare ku flet për pozicionet e Brigadës 549 të Ushtrisë Jugosllave të komanduara nga Bozhidar Deliç .
Foto 2 Harta me vendosjen e njësive në Meje dhe përreth Mejes ,shihen pozicionet e Brigadës 549 të motorizuar të komanduara nga Bozhidar Deliç në dy pika në Korenicë afër Mejes .
Foto 3 . Varrezat e viktimave të masakrës në Meje .
