MPJD demanton zyrtarët e Serbisë në raport me anëtarësimin e Kosovës në KiE

Aktuale

MPJD demanton zyrtarët e Serbisë në raport me anëtarësimin e Kosovës në KiE

Më: 5 tetor 2022 Në ora: 15:01
Foto ilustrim

Ministria e Punëve të Jashtme e Kosovës, ka hedhur poshtë pretendimet e Serbisë, se ka arritur të heqë nga rendi i ditës anëtarësimin e Kosovës në Këshillin e Evropës.

Lajmi se Serbia ka arritur t’i bindë shtetet anëtare të Këshillit të Evropës, që kërkesa e Kosovës për t’u anëtarësuar në këtë organizatë të mos jetë në agjendën e takimit të sotëm të Komitetit të Ministrave në Strasburg, është hedhur poshtë nga Ministria e Punëve të Jashtme e Kosovës.

Në përgjigje për Radio Kosovën, zëvendësministri i Punëve të Jashtme, Kreshnik Ahmeti, ka thënë se Kosova nuk ka qenë e paraparë në agjendën e sotme të Komitetit të Ministrave në Këshillin e Evropës, në nivel të ambasadorëve.

Ahmeti tha se kjo është dezinformatë e radhës nga Serbia.

Gjatë ditës është raportuar nga media të ndryshme në Serbi, kinse ky vend ka bllokuar përfshirjen e  Kosovës në agjendën e KiE-së.

Megjithatë, nga zyrtarë të KiE-së kanë thënë se diskutimet e Komitetit të Ministrave janë konfidenciale.

Kërkesën zyrtare për pranim në Këshillin e Evropës, Kosova e ka dorëzuar me 12 maj të këtij viti.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat