Ministrja Haxhiu thotë se mund të parandalohej vrasja e 35-vjeçares, ja kë fajëson

Ministrja e Drejtësisë, Albulena Haxhiu, ka thënë se në momentin që do të verifikohet dështimi institucional, hallka që ka dështuar në rastin e shtatzënës së vrarë mbrëmë te Gjinekologjia, personi përgjegjës do të japë dorëheqje.

“Në momentin që do të verifikohet dështimi institucional, hallka që ka dështuar, personi përgjegjës do të japë dorëheqje, të gjithë ne që jemi në pozicione që mbajmë kemi përgjegjësi në përputhje me legjislacionin në fuqi, kompetencat janë të ndara, ju garantoj që nëse shohim që ka dështuar dikush do të ketë dorëheqje dhe shkarkime, por keni parasysh dorëheqjet dhe shkarkimet janë kërkuar edhe kur ka dështuar prokuroria, asnjë dorëheqje asnjë shkarkim, dhe këto raste këto mosveprime kjo neglizhencë po inkurajon kriminelët dhe vrasësit. Nuk kemi sot as një prokuror asnjë gjyqtar ka dhënë dorëheqje për shkak që nuk e ka kryer detyrën”.

Ajo tutje tha se ministrja e Drejtësisë nuk ka të drejtë shkarkojë prokurorët dhe gjyqtarët.

“Po e përmend këtë sepse jo vetëm mbrëmë jo vetëm sot, por në vazhdimësi kur po vriten gratë po kërkohet nga ministrja e Drejtësisë të shkarkojë prokurorë dhe gjyqtarë, ministrja e Drejtësisë e ka përfunduar reformën në drejtësi, reforma në drejtësi pritet të votohet në kuvend, jam e bindur që në momentin që do ta kemi s’do të ketë më prokuror dhe gjyqtar që s’do t’i kryejnë detyrat e tyre. Secili që nuk e ka kryer detyrën më të vogël është dorëheqja dhe shkarkimi, por vjen në shprehje edhe përgjegjësia penale”, tha ministrja Haxhiu, para mediave, pas përfundimit të mbledhjes së grupit ndërministror.

Ministrja e Drejtësisë, Albulena Haxhiu, ka thënë sot para mediave se shtatzëna e vrarë e kishte raportuar bashkëshortin e saj në korrik të këtij viti për dhunë psiqike dhe fizike, dhe prokuroria, personin e dyshuar e kishte liruar në procedurë të rregullt.

“Pas përfundimit të takimit, siç e pamë mbrëmë një grua bashkë me foshnjën u vra pikërisht përpara objektit të Gjinekologjisë. Ishte një rast i rëndë, i kobshëm, i trishtë. Kjo na tregon se sa i shprehur është femicidi që po vranë gra e vajza.

Pesë ditë, dy gra të vrara nga bashkëshortë e tyre. Me urgjencë kemi mbledhur grupin, kemi diskutuar.

Më lejoni të iu informoj se sipas informatave, viktima kishte raportuar të dyshuarin për dhunë fizike dhe psiqike dhe Prokuroria e kishte lëshuar në procedurë të rregullt, ëhtë një papërgjegjësi dhe e prokurorit të rastit. Sikur prokuroria të ishte në krye të detyrës, rasti i tillë mund të parandalohej.

Kemi informacioneve që për shkak të hetimeve nuk mund t’i bëj të ditura. Ju garantoj që secili prej institucioneve, janë të obliguar të verifikojnë secilin veprim institucional prej momentit të parë kur është raportuar rasti”, tha ajo para mediave.