PDK bëhet anëtare me të drejta të plota të grupit të partive Liberale

Aktuale

PDK bëhet anëtare me të drejta të plota të grupit të partive Liberale

Më: 3 dhjetor 2022 Në ora: 13:06
Kryetari i Partisë Demokratike të Kosovës, Memli Krasniq

Kryetari i Partisë Demokratike të Kosovës, Memli Krasniqi, ka njoftuar se PDK është bërë sot anëtare e grupacionit më të madh politik të partive liberale të Evropës, ALDE, në Këshillin e këtij grupacioni të mbajtur në Bratisllavë.

Krasniqi ka thënë se pranimi i PDK-së në ALDE vjen si finalizim i një procesi tejet të rëndësishëm për të dhe PDK-në.

Sipas tij, ky është një hap i madh drejt përqafimit të vlerave evropiane dhe rikonfrimim i njohjes së reformave thelbësore që PDK ka bërë gjatë këtij viti.

“Pas një pune dinamike gjatë gjithë vitit, me shumë takime dhe lobime, sot, në mbledhjen e dytë vjetore të Këshillit të Partisë Aleanca e Liberalëve dhe Demokratëve të Evropës (ALDE), të mbajtur në Bratisllavë të Sllovakisë, Partia Demokratike e Kosovës është pranuar si anëtare me të drejta të plota e kësaj partie pan-evropiane”, ka njoftuar ai.

ALDE është grupacioni më i madh politik i partive të liberale të Evropës, vizion të cilin e ka përqafuar edhe PDK.

“Parimet themelore liberale të lirisë, demokracisë, shtetit të së drejtës, të drejtave të njeriut, tolerancës dhe solidaritetit – janë vlerat që promovojnë partitë politike që qëndrojnë nën ombrellën e ALDE-s, e të cilat i kemi si mision për t’i zbatuar edhe në Kosovë”, ka thënë lideri i PDK-së.

“Pranimi ynë në ALDE vjen si finalizim i një procesi tejet të rëndësishëm për mua dhe PDK-në. Ky është një hap i madh drejt përbrendësimit të vlerave evropiane dhe rikonfrimim i njohjes së reformave thelbësore që PDK ka bërë gjatë këtij viti”, ka thënë më tej ai.

Në fund, Memli Krasniqi ka thënë se një PDK e hapur dhe gjithëpërfshirëse, me vizion 50/50 për përfaqësim gjinor në të gjitha strukturat dhe nivelet e vendimmarrjes, me rini të fuqizuar dhe aktive, si dhe e integruar në rrjetin e partive liberale evropiane, është plotësisht në funksion të forcimit dhe demokratizimit të vendit dhe shoqërisë tonë!

“Urime të gjithë anëtarëve e aktivistëve dhe na priftë e mbara bashkë!”, ka përfunduar ai.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat