Dje në orët e vona, një patrullë e policisë së Kosovës është sulmuar me armë zjarri në pjesën veriore të Kosovës.
Sipas PK-së, në fshatin Serbovc, Komuna e Zveçanit, njësitet policore derisa kanë qenë në detyra të rregullta në patrullim, janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM.
“Si pasojë e incidentit, një pjesëtarë i Policisë së Kosovës është lënduar lehtë dhe janë shkaktuar dëme të konsiderueshme materiale në veturën e policisë”, tha Policia në njoftimin e mbrëmshëm.
Ndërkaq, polici i plagosur, i lindur në vitin 1982, është dërguar në QKUK për trajtim.
Polici ka marrë dy plumba në trup, njërin në toraks e tjetrin afër qafës.
Ai raportohet të jetë në gjendje të mirë shëndetësore, pasi plumbat nuk i kanë prekur organet vitale.
Në ndërkohë, polici i plagosur pritet së shpejti t’i nënshtrohet operimit për largimin e plumbave nga trupi.
