Këshilli i Ambasadorëve Shqiptarë reagon për Asociacionin: Duhet t’i ketë për bazë këto 3 parime themelore

Aktuale

Këshilli i Ambasadorëve Shqiptarë reagon për Asociacionin: Duhet t’i ketë për bazë këto 3 parime themelore

Më: 4 shkurt 2023 Në ora: 21:25
Këshilli i Ambasadorëve Shqiptarë

Çështja e krijimit të Asociacionit të komunave me shumicë serbe në Kosovë ka qenë temë kryesore e ditëve të fundit duke angazhuar diplomatë nga e gjithë bota dhe për këtë çështje ka reaguar dhe Këshilli i Ambasadorëve Shqiptarë.

Në një komunikatë për shtyp, ky këshill bën me dije se për krijimin e asociacionit duhet të zbatohen 3 parime që kanë të bëjnë me moscënimin e Kushtetutës së Kosovës, kjo strukturë të mos jetë një-etnike si dhe nuk mund të trajtohet e shkëputur nga marrëveshja përfundimtare në mes të Republikës së Kosovës dhe Republikës së Serbisë, si dy vende sovrane.

“Për sa i përket marrëveshjes për themelimin e Bashkësisë të Komunave me Shumicë Serbe në Kosovë, KASH sjell në vëmendje se themelimi i kësaj Bashkësie ka mbetur çështje e hapur nga viti 2015 dhe kjo ka ndodhur për shkak të druajtjes së arsyeshme në Prishtinë se ai entitet mund të shndërrohet në instrument të Serbisë për të minuar sovranitetin shtetëror dhe funksionalitetin kushtetues të Republikës së Kosovës.

Për të shmangur një rrezik të tillë, çdo veprim apo proces eventual lidhur me krijimin e Bashkësisë së Komunave me Shumicë Serbe në Kosovë duhet të ketë për bazë tri parime themelore:

Së pari, Bashkësia e Komunave me Shumicë Serbe nuk duhet të cënojë parimet themeltare kushtetuese të Republikës së Kosovës, siç është sovraniteti, epërsia e kushtetutës dhe karakteri unitar i Republikës së Kosovës.

Së dyti, Bashkësia e Komunave me Shumicë Serbe në Kosovë nuk mund të jetë strukturë një-entike dhe as pushtet i ndërmjetëm në mes të nivelit qëndror dhe komunave të caktuara.

Së treti, Bashkësia e Komunave me Shumicë Serbe nuk mund të trajtohet e shkëputur nga marrëveshja përfundimtare në mes të Republikës së Kosovës dhe Republikës së Serbisë, si dy vende sovrane dhe të pavarura që e njohin njëra tjetrën si të tilla”, shkruhet mes të tjerash në komunikatë.

Këshilli i Ambasadorëve Shqiptarë shpreh bindjen e plotë se Republika e Kosovës, si gjithmonë, do të sillet si shtet i përgjegjshëm, që ruan interesat shtetërore dhe aleancat strategjike, i përkushtuar për paqe dhe stabilitet në rajon dhe integrime Euro-Atlantike.

commentFirst article
Sot mund të lexoni Shfletoni kopertinat