Bislimi deklarohet pas takimit në Bruksel, tregon për çka ranë dakord me Petkoviqin

Në Bruksel ka përfunduar takimi trepalësh në mes kryenegociatorit të Kosovës, Besnik Bislimi dhe atij të Serbisë, Petar Petkoviq, me emisarin e posaçëm të Bashkimit Evropian për dialogun, Mirosllav Lajçak.

Pas këtij takimi, ku u diskutua zbatimi i marrëveshjes për normalizimin e marrëdhënieve ndërmjet Kosovës e Serbisë, Bislimi ka paralajmëruar për mundësinë e një takimi në nivel të liderëve të të dyja vendeve, kryeministrit të Kosovës, Albin Kurti dhe presidentit të Serbisë, Aleksandër Vuçiq, brenda muajit prill.

“Pati një dakordim mes palëve që takimi i radhës të niliet të lartë politik të mbahet më 22 prill. Mirëpo kjo në momentin e fundit nuk është shumë e sigurtë, pasi ka indikacione që presidenti i Serbisë të mos jetë i gatshëm për këtë datë”, ka thënë ai.

Tutje Bislimi ka bërë të ditur se në takim është diskutuar për prezantimin e draftit fillestar të grupit të menaxhmentit lidhur me vetëmenaxhimin e komunave me shumicë serbe. Ai po ashtu ka treguar edhe për çështje tjera të folura në takim.

“Ideja është që të prezantohet një draft fillestar i grupit të menaxhmentit.  Ka pak paqartësi se si duhet të ecë procedura, kujt duhet t’i prezantohet së pari e si. Pastaj kemi diskutuar për çështje të tjera aktuale, si ajo e energjisë. Edhe për shembull, kemi diskutuar edhe për çështjen e targa se si po ecën implementimi. Kam treguar se regjistrimi  deri në fund të marsit po ecë mirë, por pas djegies së makinave ka pasur kërkesa nga Serbia që Kosova të tregojë vullnet të mirë dhe të mos vendosë masa. Mendoj se kjo punë ka kaluar, nuk duhet të diskutohet për targa por të zbatohet. Po ashtu, cka është më e rëndësishmja, kemi diskutuar për mënyrën se si duhet të sekuencohet hapat e ardhëm të marrëveshjes bazike si njohja e diplomave, gjetja e të pagjeturve, mosobstruksioni i Kosovës në organizata ndërkombëtare e të tjera”, përfundoi ai. 

Zëvendëskryeministri i Kosovës dhe negociatori kryesor në dialogun me Serbinë, Besnik Bislimi, tha sot se gjatë bisedimeve në Bruksel është rënë dakord në parim që takimi i radhës i nivelit të lartë të mbahet më 22 prill.

Bislimi, pas raundit të sotëm të dialogut në nivel të negociatorëve kryesorë, ka treguar se ajo datë ende nuk është e sigurt ende.

“Për momentin nuk është e sigurt sepse ka indikacione se presidenti i Serbisë nuk mund të vijë në atë datë dhe mund të shqyrtohen data alternative”, ka shpjeguar ai gazetarëve.

Bislimi ka theksuar se pala prishtinase gjatë ditës ka pasur disa takime, kryesisht dypalëshe, e më pas edhe trepalëshe me të dërguarin e BE-së për dialogun Miroslav Lajçak dhe kryenegociatorin e Serbisë, Petar Petkoviq.