Kryeministri i vendit, Albin Kurti sot gjatë përurimit të punimeve në rrugën Prishtinë-Podujevë, tha para mediave se ka biseduar me Shefin e Diplomacisë Evropiane, Josep Borrell, si dhe me emisarin evropian, Mirsolav Lajçak.
I pari i Qeverisë ka thënë se është në kontakt me BE-në dhe theksoi se gjysmë ore ka biseduar në telefon me Borrell dhe Lajçak.
Kryeministri Kurti tha para gazetarëve se është interesuar për de-eskalim dhe normalizim, por që siç tha ai kjo nënkupton sundim të ligjit që i zmbrapsë këta kriminelët duke i detyruar të ballafaqohen me drejtësinë ose edhe të shkojnë në Serbi.
“Me BE jam në kontakt të përditshëm. Dje kam biseduar me Borrellin edhe me ndërmjetësin Lajçak, Jam interesuar edhe për de-eskalim edhe për normalizim që nënkupton sundim të ligjit që i zmbrapsë këta kriminelët duke i detyruar të ballafaqohen me drejtësinë ose edhe të shkojnë në Serbi”, tha Kurti.
Kreu i ekzekutivit sot foli edhe për masat e BE-së ndaj Kosovës, të cilat i quajti të përkohshme dhe të padrejta.
Kurti nga Podujeva, ka thënë se disa masa edhe kanë filluar që të zbatohen duke përmendur anulimin e vizitave.
“Është e vërtetë që janë paralajmëruar masa edhe janë zbatuar disa prej tyre, ju e dini që ushtrimi i madh ‘Defender Europe’, sidomos në Gjakovë ku e kishim të planifikuar u pat anulua, bëhet fjalë edhe për vizita e masa të përkohshme, të cilat për bindjen time janë të padrejta. Ajo që ne duhet të bëjmë është që në Kuvend, me 2/3 e deputetëve t’i kalojmë ato kredi dhe grante që kanë ngelur të ngujuara dhe s’po mund t’i gëzojë ekonomia e Kosova, rreth 149 milionë euro. Kredi dhe grante që pa 2/3 nuk po kalojnë”
“Teksa mërzitemi për masat aktuale të përkohshme, ne kemi një ngujim aktual të cilën mund ta kalojmë shumë kollaj bashkërisht me opozitën”, ka shtuar ai.
