Mbahet mbledhja urgjente e Këshillit për Siguri në Vushtrri, rekomandohet që Policia të shtojë kontrollin

Sot është mbajtur mbledhja urgjente e Këshillit për Siguri në Bashkësi në Komunën e Vushtrrisë, pas dy vrasjeve që kanë ndodhur në dy ditët e fundit.

Kryetari i Komunës së Vushtrrisë ka njoftuar se janë nxjerrë disa rekomandime nga kjo mbledhje urgjente.

Këto rekomandime janë: Drejtoria e Arsimit të mbajë takime të rregullta me prindërit, policia të shtojë kontrollin në të gjithë territorin, në shkolla dhe hapësira publike, gjithashtu shtimi i patrullimeve kombësore në zonat e frekuentuara.

“Respektimi i orarit të punës të lokaleve afariste, gastronomi, si dhe lokalet që si veprimtari kanë videolojërat, në institucionet fetare të mbahen ligjërata vetëdijësuese kundër dhunës, organizimi i fushatave vetëdijësuese”, ishin disa nga rekomandimet tjera, ka thënë Idrizi.

Tutje thuhet se si Komunë e Vushtrrisë mbesin të përkushtuar për bashkëpunim me të gjitha institucionet e sigurisë, me qëllim ofrimin e sigurisë së plotë për qytetarët.

Idrizi i’u ka shprehur ngushëllime familjarëve të viktimave dhe qytetarëve të Vushtrrisë.

Më 23.03.2025, një 19 vjeçar është vrarë me armë zjarri nga bashkëmoshatari i tij. Vrasja ka ndodhur rreth orës 20:35 në rrugën “Galip Badivuku” në Vushtrri.

Viktima ka inicialet A.Z., ndërsa dorasi ka inicialet B.D.

Tashmë B.D. ka pranuar fajësinë dhe më pas Gjykata Themelore në Mitrovicë ka caktuar masën e paraburgimit prej një muaji ndaj tij.

Ndërsa dje, më 24.03.2025 ka ndodhur një tjetër vrasje në fshatin Stanoc ku është vrarë një grua dhe më pas autori i dyshuar ka kryer vetëvrasje.

Familjari i viktimës, Rrahim Ajeti, para gazetarëve ka deklaruar se dyshojnë që vrasja ka ndodhur për shkak se viktima kishte ndërruar vendin e punës dhe nuk punonte më tek dorasi.

Kryetari i Vushtrrisë, Ferit Idrizi, ka thirrur mbledhje urgjente të Këshillit Komunal për Siguri në Bashkësi pas tri vrasjeve brenda 24 orëve që tronditën qytetin.

“Të nderuar qytetarë të Vushtrrisë dhe të gjithë Republikës së Kosovës, dy ditët e fundit kanë sjellë ndodhi tragjike që na kanë prekur të gjithëve thellë”, ka shkruar Idrizi në Facebook.

“Si Kryetar i Komunës, nuk kam fjalë të mjaftueshme për të shprehur dhimbjen dhe shqetësimin që ndiej për humbjen e jetëve të tre qytetarëve të komunës tonë”.

“Ky ka qenë një moment shumë i vështirë për të gjithë ne dhe për komunitetin tonë. Për këtë arsye, direkt kam thirrur një mbledhje urgjente të Këshillit Komunal për Siguri në Bashkësi”.

Ai tha se organet e sigurisë tashmë po i trajtojnë këto raste dhe se drejtësia do ta thotë fjalën e fundit.

“Në këto momente të vështira, ngushëllimet e mia shkojnë për familjarët e viktimave dhe për të gjithë qytetarët e Vushtrrisë që po përjetojnë këtë dhimbje të papërshkrueshme”.

“Organet e sigurisë po i trajtojnë këto dy raste dhe ne presim që drejtësia ta thotë fjalën e fundit”.

“Faleminderit për mirëkuptimin dhe bashkëpunimin tuaj”.